कंधार : प्रतिनिधी
प्रतिकूल परिस्थितीवर मात करत शिक्षण पूर्ण करून पोलीस सेवेत दाखल झालेल्या स्व.विशाल येंगडे यांचे पीएसआय होण्याचे अपूर्ण स्वप्न त्यांच्या मोठ्या बहिण तथा सामाजिक कार्यकर्त्या सौ.साधना येंगडे (अटकोरे) यांनी ‘विशाल अभ्यासिका’च्या माध्यमातून पूर्ण केले. स्वातंत्र्यदिनाचे औचित्य साधून १५ ऑगस्ट रोजी कंधार शहरातील मुक्ताईनगर परिसरात या अभ्यासिकेचा शुभारंभ करण्यात आला.
घरची आर्थिक परिस्थिती हलाखीची असतानाही विशाल येंगडे यांनी घरोघरी वृत्तपत्रे वाटून शिक्षण पूर्ण केले. जिद्द व मेहनतीच्या जोरावर ते पोलीस सेवेत दाखल झाले. पीएसआय होण्यासाठी त्यांचा अभ्यास सुरू होता. सुट्टीच्या काळात ते कंधार नगरपरिषदेच्या डॉ. बाबासाहेब आंबेडकर सार्वजनिक वाचनालयात तासन्तास अभ्यास करीत. विद्यार्थ्यांसाठी स्वतंत्र व शांत अभ्यासिका सुरू करण्याची त्यांची इच्छा होती. मात्र, दुर्दैवी अपघातात त्यांचे निधन झाल्याने हे स्वप्न अपूर्ण राहिले. भावाची ही इच्छा पूर्ण करण्याचा निर्धार साधना येंगडे यांनी केला.
‘ध्येय तुमचे, साथ आमची‘ या संकल्पनेतून सुरू करण्यात आलेली ‘विशाल अभ्यासिका’ स्पर्धा परीक्षांची तयारी करणाऱ्या विद्यार्थ्यांसाठी उपयुक्त ठरणार आहे. शांत व शिस्तबद्ध वातावरणात विद्यार्थ्यांना अभ्यासाची सुविधा मिळणार असून, अनेक विद्यार्थ्यांच्या भवितव्याला या उपक्रमातून क्रमातून नवी दिशा मिळेल. शुभारंभप्रसंगी अॅड. मुक्तेश्वरभाऊ धोंडगे (शिवसेना नेते), सिनेस्टार व काँग्रेस नेते एकनाथ पवार, पोलीस उपनिरीक्षक अरविंद घोडके, नगराध्यक्ष शहाजीराजे नळगे, वंचित बहुजन आघाडीचे जिल्हाध्यक्ष शंकर महाजन, कॉंग्रेस कंधार तालुका अध्यक्ष संजय भोसीकर, माजी जिल्हाध्यक्ष शिवाभाऊ नरंगले, माजी उपनगराध्यक्ष तथा नगरसेवक सुधाकर कांबळे,नगरसेवक राजूभाऊ सोनकांबळे, पोलीस पाटील व्यंकट पा. जाधव, मुंडे करिअर अकॅडमीचे संचालक योगेश मुंडे, रमाताई कठारे, सानिया पारडे, गंगासागर दिग्रसकर, मनोज जमदाडे, मोहसीन बागवान, प्रेमानंद गायकवाड,अविनाश कांबळे, अजय मोरे,सचिन श्रीरंगवाड,अजिंक्य पंडागळे यांच्यासह विविध क्षेत्रांतील मान्यवर व नागरिक उपस्थित होते.
यावेळी सौ. साधना येंगडे यांच्या वतीने मान्यवरांचा सत्कार करण्यात आला. विद्यार्थ्यांनी अभ्यासिकेचा लाभघेऊन आपले ध्येय निश्चित करावे व सातत्यपूर्ण मेहनतीने यश संपादन करावे, असे आवाहन मान्यवरांनी केले.
About the Author
