लोहा (प्रतिनिधी):
लोहा तालुक्यातील जिल्हा परिषद कलंबर सर्कल हे यंदा सर्वसाधारण (महिला) वर्गासाठी राखीव सुटले असून, या ठिकाणी MRS (एम. आर. एस.) पक्षाकडून माजी आमदार शंकरअण्णा धोंडगे यांच्या सुनबाई सौ. पुष्पा शिवराज पाटील धोंडगे यांची उमेदवारी निश्चित मानली जात आहे.कलंबर सर्कलमध्ये धोंडगे परिवाराचा प्रभाव आणि संघटनशक्ती आजही ठळकपणे जाणवते. सध्या शिवराज दादा धोंडगे व जिल्हा परिषदेचे माजी उपाध्यक्ष दिलीप दादा धोंडगे हे सौ. पुष्पा धोंडगे यांच्या प्रचारार्थ कलंबर, मोकलेवाडी, गुंडेवाडी, मलकापूर, रायवाडी, गोलेगाव पक, गोलेगाव वाडी, गोधनीतांडा, किरोडा, निळा, शेलगाव, पोखरी, धानोरा, चोंडी, हाडोळी, धावरी आदी गावांमध्ये दौरे करत असून, मतदारांच्या समस्या ऐकून तत्काळ निराकरणाचे आश्वासन देत आहेत.
मतदारसंघात माजी आमदार शंकरअण्णा धोंडगे यांचे कार्य व विकासदृष्टी आजही जनतेच्या मनात ठसलेले आहे. त्यांच्या आमदारकीच्या काळात लिंबोटी धरणातून कॅनॉलद्वारे पाणी आणून कलंबर सर्कलला हिरवा शालू नेसवला, अशी ग्रामस्थांची भावना आहे. सिंचन प्रकल्प, बंधारे व विविध विकासकामांमुळे शेतकरी वर्गात “धोंडगे नाव म्हणजे विश्वास” असा भाव निर्माण झाला आहे.
जिल्हा परिषदेचे माजी उपाध्यक्ष दिलीप दादा धोंडगे यांनीही आपल्या कार्यकाळात कोट्यवधी रुपयांचा निधी आणून विकासकामांची अमलबजावणी केली. सध्या ते व शिवराज दादा यांच्या नेतृत्वाखाली कलंबर सर्कलमधील सर्व गावांचा दौरा पूर्ण झाला असून, गावोगावी मतदारांकडून उत्स्फूर्त प्रतिसाद मिळत आहे.
यंदा सर्कल महिला आरक्षणात गेल्याने सौ. पुष्पा शिवराज धोंडगे या राजकारणात पदार्पणासाठी सज्ज झाल्या आहेत. धोंडगे परिवाराच्या विकास परंपरेला न्याय देत, त्यांचा प्रचार व्यावहारिक, विकासाभिमुख आणि शेतकरीहिताच्या मुद्यांवर केंद्रित राहणार आहे.
कलंबर सर्कलमध्ये सध्या MRS पक्षाकडून सौ. पुष्पा धोंडगे यांच्या उमेदवारीला गती मिळाली असून, धोंडगे परिवाराच्या मजबूत संघटन आणि जनाधारामुळे ही लढत चुरशीची ठरणार असल्याचे राजकीय वर्तुळात चर्चिले जात आहे.
About the Author
