मुखेड (प्रतिनिधी) :
येथील विठ्ठलराव कोल्हे गुरुजी विद्यालय (बु.) येथे मुख्याध्यापक म्हणून कार्यरत असलेले संजय व्यंकटराव गोंड यांचे नुकतेच निधन झाले. त्यांच्या जाण्याने शैक्षणिक क्षेत्रात मोठी पोकळी निर्माण झाली असून सर्वत्र हळहळ व्यक्त केली जात आहे.
काल दिनांक 20 मार्च रोज शुक्रवारी सकाळी नऊ वाजता दुचाकी वरून शाळेकडे कडे जात असताना संबुटवाड पेट्रोल पंपाच्या समोर दुचाकीवरून त्यांचा अपघात झाला तर नंतर त्यांना मुखेड उपजिल्हा रुग्णालयात तात्पुरता इलाज करून नांदेड येथे यशोसाई रुग्णालय दाखल करण्यात आले. उपचारास प्रतिसाद न दिल्यामुळे उपचारादरम्यान त्यांचे निधन झाले. गोंड हे कर्तव्यदक्ष, शिस्तप्रिय व विद्यार्थ्यांप्रती अतूट प्रेम असलेले मुख्याध्यापक म्हणून ओळखले जात होते. शिक्षण क्षेत्रात त्यांनी दिलेले योगदान मोलाचे असून अनेक विद्यार्थ्यांच्या आयुष्याला त्यांनी योग्य दिशा दिली. त्यांच्या मार्गदर्शनाखाली अनेक विद्यार्थ्यांनी यश संपादन केले.
नुकतेच त्यांनी गंगाबाई माध्यमिक विद्यालय, सावरगाव पिर येथे आयोजित शालांत प्रमाणपत्र परीक्षेत प्रमुख परीक्षक म्हणून उत्कृष्ट जबाबदारी पार पाडली होती. त्यांच्या कामकाजातील प्रामाणिकपणा व शिस्त यामुळे सहकारी शिक्षक व प्रशासन यांच्यात त्यांचा विशेष सन्मान होता. त्यांच्या निधनाची बातमी समजताच शैक्षणिक व सामाजिक क्षेत्रातून शोक व्यक्त करण्यात येत असून, त्यांच्या आत्म्यास शांती लाभावी अशी प्रार्थना व्यक्त केली जात आहे.
अंत्यविधी रविवार दि. २२ मार्च २०२६ रोजी सकाळी १० वाजता मोतीनदी स्मशानभूमी, मुखेड येथे होणार आहे. त्यांच्या पश्चात कुटुंबीय, नातेवाईक व मोठा विद्यार्थी परिवार असा विशाल परिवार आहे. त्यांच्या निधनाने जाम गावावरती शोक काळा पसरली असून आमदार डॉ.तुषार राठोड माजी नगर अध्यक्ष गंगाधर राठोड, संस्थाचालक अनिल कोल्हे मुखेड भूषण डॉ. दिलीप पुंडे मनोज गौंड दादाराव आगलावे, श्याम क्षत्री, ओमकार सोनटक्के यांच्यासह अनेकांनी दुःख व्यक्त केले आहे.
About the Author
