कंधार : प्रतिनिधी
मॉर्निंग वॉकसाठी जात असताना कंधार येथील पत्रकार नगर येथील रहिवासी सय्यद सलीमा यांच्या अंगावर रस्त्यावरील गिट्टी-दगड उडून लागला होता. त्यानंतर त्यांची पाच वर्षांची नात सय्यद अंशरा हबीब हिने हा रस्ता लवकरात लवकर चांगला व्हावा, अशी इच्छा व्यक्त केली होती. एवढेच नव्हे तर, ‘हा रस्ता कोण करून देऊ शकतो?’ असा निरागस प्रश्नही ती वारंवार घरच्यांना विचारत होती. काळ लोटला आणि रस्त्याच्या दुरवस्थेचा प्रश्न मार्गी लागला. आमदार प्रताप पाटील चिखलीकर यांच्या प्रयत्नातून रस्त्याचे काम सुरू झाल्याचे कुटुंबीयांनी अंशराला सांगितले. रस्ता झाल्याची माहिती मिळाल्यानंतर तिच्या मनात आमदारांचे आभार मानण्याची इच्छा निर्माण झाली.रस्त्याशी निगडित एक हृदयस्पर्शी प्रसंग सध्या कंधारमध्ये चर्चेचा विषय ठरत आहे.
मुखेड फाटा ते कंधार शहराला जोडणाऱ्या मुख्य रस्त्याची अनेक दिवसांपासून असलेली दुरवस्था, खड्डे आणि नागरिकांची गैरसोय याबाबत प्रसारमाध्यमांनी सातत्याने आवाज उठवला. या पाठपुराव्यानंतर अखेर या मार्गावरील हॉटमिक्स रस्त्याचे काम झाले आणि खड्डेमय रस्त्यापासून नागरिकांची सुटका झाली. मात्र, या रस्त्याशी निगडित एक हृदयस्पर्शी प्रसंग सध्या कंधारमध्ये चर्चेचा विषय ठरत आहे.
स्वातंत्र्यदिनाचे औचित्य साधून चिमुकलीने थेट आमदार प्रताप पाटील चिखलीकर यांची भेट घेतली. ‘या रस्त्यामुळे माझ्या आजीला दुखापत झाली होती. आता तुम्ही रस्ता करून दिलात, त्याबद्दल तुमचे खूप खूप आभार,’ अशा निरागस शब्दांत अंशराने आमदारांचे आभार मानले.
अवघ्या पाच वर्षांच्या चिमुकलीने रस्त्याच्या प्रश्नाची दखल घेत स्वतः पुढाकार घेऊन आमदारांची भेट घेतल्याने उपस्थितांचेही लक्ष वेधले गेले. तिच्या या निरागस आणि संवेदनशील कृतीचे सर्व स्तरातून कौतुक होत आहे.
About the Author
