कंधार : प्रतिनिधी
शैक्षणिक योजनांची प्रभावी अंमलबजावणी करून पात्र विद्यार्थ्यांना त्यांचा लाभ वेळेत मिळवून देण्यासोबतच शाळांची शैक्षणिक गुणवत्ता उंचावण्यासाठी मुख्याध्यापक व शिक्षकांनी समन्वयाने प्रयत्न करावेत. कंधार तालुका शैक्षणिक गुणवत्तेत अग्रेसर राहण्यासाठी सर्वांनी आपली जबाबदारी प्रभावीपणे पार पाडावी, असे आवाहन केंद्रप्रमुख तथा केंद्रसमन्वयक परमेश्वर सूर्यवंशी पाटील यांनी केले.
गटसाधन केंद्र, कंधार येथे दि.15 सप्टेंबर रोजी कोटबाजार कंधार केंद्रातील जिल्हा परिषद व खासगी शाळांच्या शैक्षणिक गुणवत्तेसह शिक्षक, विद्यार्थी व शाळा मॉड्यूलच्या ऑनलाइन कामाचा आढावा घेण्यासाठी बैठक आयोजित करण्यात आली होती. यावेळी ते मार्गदर्शन करताना बोलत होते.
कोटबाजार कंधार केंद्राचे केंद्रप्रमुख तथा केंद्रसमन्वयक म्हणून परमेश्वर सूर्यवंशी पाटील हे नुकतेच रुजू झाले. यानिमित्त खासगी शिक्षक महासंघ, खासगी मुख्याध्यापक-शिक्षक तसेच केंद्रातील जिल्हा परिषद शाळांच्या वतीने त्यांचा सत्कार करण्यात आला.
बैठकीत व्हीएसके हजेरी, शालेय पोषण आहारातील धान्याची योग्य साठवणूक व स्वच्छता, विद्यार्थी-शिक्षक-शाळा मॉड्यूल, यू-डायस प्लस, आधार अपडेट, आपार आयडी तसेच एनबीयू पेंडिंगची संख्या शून्यावर आणणे याबाबत सविस्तर आढावा घेण्यात आला.
शाळेतील तुकडी, माध्यम, शाळा व्यवस्थापन प्रकार, शिक्षक व शिक्षकेतर कर्मचाऱ्यांची माहिती, कार्यरत पदे, विद्यार्थ्यांची वर्गनिहाय संख्या व पोषण आहाराची माहिती अचूकपणे अद्ययावत करण्याच्या सूचना देण्यात आल्या.खान अकॅडमीअंतर्गत अध्ययन कार्यक्रमात सर्व विद्यार्थ्यांची नोंदणी, निपुण महाराष्ट्र अभियानातील आवश्यक नोंदी, पालकांची माहिती, एनआयएलपीअंतर्गत उल्हास ॲपवरील माहिती भरणे, यासोबतच शिष्यवृत्ती व नवोदय परीक्षेच्या तयारीबाबतही मार्गदर्शन करण्यात आले.
विद्यार्थ्यांच्या गुणवत्तावाढीसाठी शाळास्तरावर सातत्यपूर्ण प्रयत्न, योजनांची प्रभावी अंमलबजावणी आणि ऑनलाइन कामांमध्ये अचूकता यांना प्राधान्य देण्याचे आवाहन यावेळी करण्यात आले.
बैठकीस शिक्षक समन्वयक आनंद तपासे, शेख मुस्सा, भास्कर पाटील कळकेकर, राजहंस शहापुरे, बसवेश्वर मंगनाळे यांच्यासह खासगी व जिल्हा परिषद शाळांतील मुख्याध्यापक उपस्थित होते. सूत्रसंचालन दिगांबर वाघमारे यांनी केले.
About the Author
