सर्पदंश दखलपात्र अपघात घोषित डॉ. पुंडे यांचे अनेक वर्षाचे स्वप्न साकार
मुखेड : (दादाराव आगलावे)
सर्पदंशाच्या घटनांमुळे होणारे मृत्यू व अपंगत्व रोखण्यासाठी महाराष्ट्र शासनाने सर्पदंशाला ‘अधिसूचित आजार’ म्हणून घोषित करून सर्पदंशाच्या प्रत्येक प्रकरणाची नोंद करणे बंधनकारक केले आहे. या पार्श्वभूमीवर आता महाराष्ट्रासाठी सर्पदंश विषबाधा नियंत्रणाचा विशेष राज्य कृती आराखडा तयार करण्याच्या दिशेने महत्त्वपूर्ण पाऊल उचलण्यात आले आहे.
यासाठी मुखेडचे सुप्रसिद्ध सर्पदंश उपचारतज्ज्ञ डॉ. दिलीप पुंडे यांना महाराष्ट्र शासनाच्या सार्वजनिक आरोग्य विभागाने राज्यस्तरीय मल्टी-स्नेकहोल्डर कॉन्सुलेशन ऑन स्नेकबाईट इन्वेनॉमिंग मध्ये विशेष तज्ज्ञ म्हणून निमंत्रित केले आहे. २९ सप्टेंबर २०२६ रोजी हाफकिन इन्स्टिट्यूट फॉर ट्रेनिंग, रिसर्च अँड टेस्टिंग येथे ही राज्यस्तरीय सल्लामसलत आयोजित करण्यात आली आहे. कार्यक्रमाच्या अधिकृत अजेंड्यामध्ये डॉ. दिलीप पुंडे यांचा स्नेक बाईट इन्वेनॉमिंग नॅशनल एक्सपर्ट म्हणून सहभाग नमूद करण्यात आला आहे.
या बैठकीत सर्पदंशाच्या प्रतिबंधापासून प्रथमोपचार, आरोग्य केंद्रातील उपचार, रुग्ण संदर्भ सेवा आणि उपचारानंतरच्या पाठपुराव्यापर्यंतच्या संपूर्ण व्यवस्थेतील त्रुटी व आवश्यक उपाययोजनांवर चर्चा होणार आहे. त्यानंतर राज्य कृती आराखड्यातील प्राधान्यक्रम, विविध विभागांच्या जबाबदाऱ्या, ठोस कृती, कालमर्यादा तसेच टेक्निकल रिसोर्स ग्रूपची निर्मिती यावर काम केले जाणार आहे. डॉ. दिलीप पुंडे यांनी गेल्या अनेक वर्षांपासून सर्पदंश प्रतिबंध, उपचार, जनजागृती आणि प्रशिक्षणाच्या माध्यमातून केलेल्या कार्याला या निमंत्रणामुळे महत्त्वाची दखल मिळाली आहे. सर्पदंशाच्या क्षेत्रात राष्ट्रीय पातळीवरील तज्ज्ञ म्हणून त्यांचा सहभाग यापूर्वीही विविध उपक्रमांमध्ये राहिला आहे. महाराष्ट्रासाठी सर्पदंशावरील स्वतंत्र कृती आराखडा तयार करण्याच्या प्रक्रियेत डॉ. पुंडे यांचा अनुभव उपयोगी ठरणार असून, त्यांच्या अनेक वर्षांच्या कार्यातून पाहिलेले स्वप्न साकार होण्याच्या दिशेने हे महत्त्वाचे पाऊल मानले जात आहे. या महत्त्वपूर्ण कार्यासाठी मा. आमदार डॉ. तुषारजी राठोड साहेब तसेच आयएमएचे मुखेडचे अध्यक्ष डॉ. अशोक कौरवार, सचिव डॉ. कैलास पाटील आणि सर्व पदाधिकारी व सदस्यांनी केलेल्या विशेष प्रयत्नांचे कौतुक होत आहे.
डॉ. दिलीप पुंडे यांच्या या विशेष निवडीबद्दल आमदार डॉ. तुषार राठोड, आयएमए मुखेडचे पदाधिकारी व सर्व सदस्यांचे नागरिकांकडून हार्दिक अभिनंदन व धन्यवाद व्यक्त करण्यात येत आहेत.
About the Author
