कंधार : (दिगांबर वाघमारे )
सेवा संकल्प अभियानांतर्गत नगरेश्वर प्राथमिक शाळा, कंधार येथे सोमवार, दि. २८ सप्टेंबर रोजी प्लास्टिकमुक्ती जनजागृती मोहीम तसेच विविध पर्यावरणपूरक उपक्रम उत्साहात राबविण्यात आले. विद्यार्थ्यांमध्ये पर्यावरण संवर्धनाची जाणीव निर्माण व्हावी आणि प्लास्टिकचा वापर कमी करण्याचा संदेश समाजापर्यंत पोहोचावा, या उद्देशाने या उपक्रमांचे आयोजन करण्यात आले.
यावेळी विद्यार्थ्यांनी कापडी पिशव्या तयार करणे, टाकाऊ वस्तूंपासून टिकाऊ व उपयोगी वस्तू तयार करणे आदी उपक्रमांमध्ये उत्स्फूर्त सहभाग घेतला. टाकाऊ वस्तूंचा पुनर्वापर करून आकर्षक व उपयुक्त वस्तू तयार करण्याचे कौशल्य विद्यार्थ्यांनी दाखवून दिले. विद्यार्थ्यांनी स्वतः तयार केलेल्या विविध वस्तू, कापडी पिशव्या तसेच टाकाऊ वस्तूंपासून तयार केलेल्या कलाकृतींचे प्रदर्शन यावेळी भरविण्यात आले.
प्लास्टिकच्या वाढत्या वापरामुळे पर्यावरणावर होणारे दुष्परिणाम लक्षात घेता ‘प्लास्टिक टाळा, कापडी पिशवी वापरा’ असा संदेश विद्यार्थ्यांनी दिला. दैनंदिन जीवनातील टाकाऊ वस्तूंचा योग्य वापर करून त्यापासून उपयुक्त वस्तू निर्माण करता येतात, हे विद्यार्थ्यांनी आपल्या कृतीतून दाखवून दिले.
या उपक्रमासाठी शाळेचे मुख्याध्यापक बसवेश्वर मंगनाळे यांनी मार्गदर्शन केले. त्यांनी विद्यार्थ्यांना पर्यावरण संवर्धन, स्वच्छता आणि प्लास्टिकमुक्त जीवनशैलीचे महत्त्व समजावून सांगितले. शाळेतील सर्व शिक्षक व शिक्षकेत्तर कर्मचाऱ्यांनी उपक्रमाच्या यशस्वी आयोजनासाठी सहकार्य केले.
या उपक्रमास गटशिक्षण अधिकारी वसंत मेटकर, शिक्षण विस्तार अधिकारी प्रविण पाटील आणि केंद्रप्रमुख परमेश्वर सुर्यवंशी यांनी शुभेच्छा देत विद्यार्थ्यांनी तयार केलेल्या वस्तूंचे कौतुक केले.
About the Author
