कंधार ; दिगांबर वाघमारे
दिव्यांग मतदारांचा मतदानातील सक्रिय सहभाग वाढविण्याच्या उद्देशाने नगरपरिषद कंधार आणि मतदान जनजागृती विभाग (SVEEP) यांच्या संयुक्त विद्यमाने कंधार शहरातील सर्व दिव्यांग मतदारांचा विशेष मेळावा दि१९ रोजी उत्साहात आयोजित करण्यात आला. दिव्यांग बांधवांना आगामी निवडणुकांमध्ये कोणत्याही तांत्रिक अडचणीशिवाय मतदान करता यावे, यासाठी विविध सुविधा आणि उपलब्ध सेवांची माहिती या मेळाव्यात देण्यात आली.
मेळाव्यात निवडणूक निर्णय अधिकारी रामेश्वर गोरे आणि सहाय्यक निवडणूक निर्णय अधिकारी संदीप भोळे यांनी दिव्यांग मतदारांना मतदानाच्या दिवशी उपलब्ध करून देण्यात येणाऱ्या सुलभ सुविधांबाबत सविस्तर माहिती दिली. व्हीलचेअरची सोय, मतदान केंद्रांवर रॅम्प, दिव्यांगांसाठी स्वतंत्र सहाय्य, तसेच मतदान केंद्राच्या शेजारी विश्रांती कक्ष या सर्व सेवा सुनिश्चित करण्यात येणार असल्याचे त्यांनी सांगितले.
या उपक्रमाचा मुख्य उद्देश “एकही पात्र दिव्यांग मतदार मतदानापासून वंचित राहणार नाही” हा असल्याचे प्रशासनाने स्पष्ट केले. उपस्थित दिव्यांग बांधवांकडूनही या उपक्रमास उत्स्फूर्त प्रतिसाद मिळाला.
मेळाव्याचे नियोजन आणि समन्वयाचे कार्य नगरपरिषद कंधारच्या दिव्यांग विभागाचे प्रमुख अरविंद लोणे, समुदाय संघटक मरशिवणे , तसेच SVEEP कक्ष प्रमुख अभियंता गुट्टे, लिपिक सचिन म्हैसना आणि संदीप जाधव यांनी प्रभावीपणे पार पाडले.या उपक्रमामुळे कंधार शहरात दिव्यांग मतदारांचा मतदानातील सहभाग नक्कीच वाढेल, अशी आशा व्यक्त करण्यात आली.
✦ मतदार शपथ
या मेळाव्याचा एक महत्त्वाचा भाग म्हणजे दिव्यांग मतदारांनी सामूहिकरीत्या घेतलेली मतदार शपथ.
या शपथविधीद्वारे सर्वांनी लोकशाही मजबूत करण्यासाठी प्रामाणिकपणे, निर्भयपणे आणि कोणत्याही प्रलोभनाला बळी न पडता मतदान करण्याचा संकल्प व्यक्त केला.
शपथेमुळे दिव्यांग मतदारांमध्ये मतदानाची जाणीव, आपलेपणा आणि जबाबदारीची भावना अधिक दृढ झाली.
About the Author
