प्रवाशांच्या सेवेसाठी ‘सुप्रभात मित्र मंडळा’चा स्तुत्य उपक्रम…! मुखेड बसस्थानकात सिमेंटच्या बेंचेसचा लोकार्पण सोहळा उत्साहात संपन्न

 

मुखेड :

प्रवाशांना बसस्थानकात बसण्यासाठी चांगली सुविधा उपलब्ध व्हावी, विशेषतः वृद्ध, महिला, बालक व ज्येष्ठ नागरिकांची गैरसोय दूर व्हावी, या सामाजिक बांधिलकीच्या भावनेतून सुप्रभात मित्र मंडळ, मुखेड यांच्या वतीने मुखेड बसस्थानकाच्या प्रांगणात सिमेंटचे बेंचेस बसविण्यात आले. या बेंचेसचा लोकार्पण सोहळा उत्साहपूर्ण वातावरणात संपन्न झाला.

कार्यक्रमाच्या अध्यक्षस्थानी सुप्रभात मित्र मंडळाचे संस्थापक अध्यक्ष तथा ‘मुखेड भूषण’ डॉ. दिलीपराव पुंडे होते, तर उद्घाटक म्हणून मुखेड आगाराचे आगार प्रमुख सुभाषराव पवार यांची प्रमुख उपस्थिती होती. यावेळी सुप्रभात मित्र मंडळाचे अध्यक्ष लक्ष्मण पत्तेवार, सचिव जीवन कवटीकवार, कार्याध्यक्ष अशोक कोत्तावार, संघटक उत्तम कुलकर्णी, डॉ. एम. जे. इंगोले, डॉ. आर. जी. स्वामी, नारायणराव बिलोलीकर, नंदकुमार मडगुलवार आदी मान्यवर उपस्थित होते. सुप्रभात मित्र मंडळाचे अध्यक्ष लक्ष्मण पत्तेवार व आगार प्रमुख सुभाषराव पवार यांच्या हस्ते श्रीफळ फोडून सिमेंटच्या बेंचेसचा लोकार्पण सोहळा पार पडला. यावेळी प्रवाशाचा सन्मान करून त्यांच्याप्रतीही आदर व्यक्त करण्यात आला. अध्यक्षीय समारोप करताना मुखेड भूषण डॉ. दिलीपराव पुंडे म्हणाले की, एसटी महामंडळ ही महाराष्ट्राच्या जनजीवनाशी जोडलेली ‘लाल परी’ असून, काळानुसार तिचे रूप बदलत गेले आहे. शिवशाही, शिवाई, स्लीपर कोच अशा आधुनिक बससेवांच्या माध्यमातून एसटी प्रवाशांना अधिक आरामदायी व सुरक्षित प्रवास देण्याचा प्रयत्न करीत आहे.

आजच्या काळात प्रवाशांची सुरक्षा आणि कर्मचाऱ्यांचे आरोग्य यांना सर्वोच्च प्राधान्य असले पाहिजे. सुरक्षा सप्ताहाच्या माध्यमातून सुरक्षित प्रवासाबाबत जनजागृती केली जाते; मात्र सुरक्षा ही केवळ सप्ताहापुरती मर्यादित न राहता ती दैनंदिन कार्यसंस्कृतीचा भाग झाली पाहिजे. एसटीचा चालक, वाहक आणि प्रत्येक कर्मचारी निरोगी, निर्व्यसनी, शिस्तप्रिय व कर्तव्यनिष्ठ असणे आवश्यक आहे. आधुनिक तंत्रज्ञानाचा स्वीकार करून एसटीने बदलत्या काळाशी जुळवून घेतले आहे. भविष्यातही प्रवाशांच्या सेवेसाठी एसटीने अशाच प्रकारे नवनवीन सुविधा आणि आधुनिक तंत्रज्ञान स्वीकारावे. एसटीचे रूप बदलले, तंत्रज्ञान बदलले, बस बदलल्या; पण सर्वसामान्य जनतेची सेवा करण्याची तिची भावना मात्र कायम राहिली आहे. म्हणूनच ‘लाल परी’ आजही प्रत्येकाच्या जिव्हाळ्याची आहे. आगार प्रमुख सुभाषराव पवार यांनी सुप्रभात मित्र मंडळाच्या सामाजिक उपक्रमाचे कौतुक करताना सांगितले की, “सुप्रभात मित्र मंडळाने मुखेड बसस्थानकासाठी केलेले सहकार्य मी कधीही विसरू शकणार नाही. प्रवाशांच्या सोयीसाठी सुप्रभात सातत्याने विविध उपक्रम राबवत आहे. हा उपक्रम निश्चितच कौतुकास्पद आहे. बसस्थानकात उभ्या असलेल्या प्रवाशांबरोबरच रस्त्यावर उभ्या असलेल्या प्रवाशांकडेही आमचे लक्ष असते. त्यांना सुरक्षितपणे बसमध्ये घेण्याचा आमचा प्रयत्न असतो. प्रवाशांना वेळेत व सुरक्षित प्रवास मिळावा यासाठी माझी संपूर्ण टीम मनापासून काम करत आहे. सदर सिमेंटचे बेंचेस हे सुप्रभात मित्र मंडळाचे कार्याध्यक्ष अशोक कोत्तावार यांच्या वाढदिवसानिमित्त, सुप्रभात मित्रमंडळाच्या वतीने बसविण्यात आले आहेत.

 

सुप्रभात मित्र मंडळाच्या माध्यमातून मुखेड शहरात विविध सामाजिक, आरोग्यविषयक व जनहिताचे उपक्रम सातत्याने राबविले जात आहेत. सार्वजनिक ठिकाणी नागरिकांना आवश्यक सुविधा उपलब्ध करून देणे, गरजूंच्या मदतीसाठी पुढाकार घेणे आणि सामाजिक बांधिलकी जपणे, या कार्याची उपस्थित मान्यवरांनी प्रशंसा केली. यावेळी गोपाळ पत्तेवार, शिवाजी कोनापुरे, बालाजी देबडवार, शंभू कवटिकवार, कांतू चौधरी, बालाजी वट्टमवार, दादाराव आगलावे, प्रविण कवटीकवार, मनोज जाजू, दिनेश चौधरी, नंदकुमार जयस्वाल, बालाजी नगरे पाटील, वाहक कागणे यांच्यासह एसटी कर्मचारी, सुप्रभात मित्र मंडळाचे पदाधिकारी, सदस्य व प्रवासी मोठ्या संख्येने उपस्थित होते. कार्यक्रमाचे सूत्रसंचालन दादाराव आगलावे यांनी केले तर जीवन कवटीकवार यांनी आभार मानले. शेवटी प्रवाशांना बालाजी वट्टमवार यांच्यावतीने केळी वाटप करून कार्यक्रमाची सांगता झाली.

About the Author

yugsakshi-admin

Administrator

Visit Website View All Posts