कंधार : ( दिगांबर वाघमारे )
संत गाडगेबाबा शिक्षण संस्था, कंधार संचलित महात्मा फुले प्राथमिक शाळेत डिजिटल शिक्षणाचा नवा अध्याय सुरू झाला असून इयत्ता पहिली ते चौथीच्या विद्यार्थ्यांसाठी गुगल टीव्हीद्वारे ऑनलाइन व दृश्याधारित शिक्षणाची सुविधा उपलब्ध करून देण्यात आली असून दि.13 फेब्रुवारी रोजी संत गाडगेबाबा शिक्षण संस्थेचे सचिव चेतनभाऊ केंद्रे यांच्या हस्ते उदघाटन करून शुभारंभ करण्यात आला.या उपक्रमामुळे महात्मा फुले प्राथमिक शाळा तालुक्यातील डिजिटल शिक्षण देणारी आदर्श शाळा ठरणार आहे.
या उपक्रमासाठी संस्थेचे संस्थापक अध्यक्ष प्रा. डी.एन. केंद्रे यांनी निधी उपलब्ध करून दिला असून संस्थेचे सचिव चेतनभाऊ केंद्रे, संचालिका तथा माजी नगराध्यक्षा, विद्यमान नगरसेविका सौ. अनुराधा केंद्रे यांनी प्रत्यक्ष चारही वर्गांसाठी गुगल टीव्ही उपलब्ध करून देत हा उपक्रम साकार केला. या बद्दल विद्यार्थी व शिक्षकांच्या वतीने संस्थेचे मनःपूर्वक आभार व्यक्त करण्यात आले.
डिजिटल वर्गाच्या माध्यमातून विद्यार्थ्यांना मराठी, इंग्रजी व गणित या विषयांचे अध्यापन अधिक आकर्षक, समजण्यास सोपे आणि दर्जेदार पद्धतीने करता येणार आहे. चित्र, व्हिडिओ आणि अॅनिमेशनच्या साहाय्याने शिकविल्यामुळे विद्यार्थ्यांची अभ्यासातील रुची वाढण्यास मदत होणार असल्याची माहिती उदघाटक चेतन भाऊ केंद्रे यांनी यावेळी दिली.
या संदर्भात मुख्याध्यापक डी. जी. वाघमारे यांनी सांगितले की, “डिजिटल शिक्षणामुळे विद्यार्थ्यांच्या संकल्पना अधिक दृढ होतील. शिक्षक देखील या सुविधेचा दर्जेदार वापर करून अध्यापन अधिक प्रभावी करण्यासाठी प्रयत्नशील राहतील.”
या उपक्रमामुळे विद्यार्थ्यांच्या सर्वांगीण विकासाला चालना मिळणार असून शाळेच्या शैक्षणिक गुणवत्तेत निश्चितच भर पडणार असल्याचे यावेळी लोकार्पण सोहळ्यात सांगितले. यावेळी जे.जी केंद्रे, जी. टी. गुट्टे, सौ. कागणे यु.एम., आगलावे ए. बी.केंद्रे आर एस. माणिक बोरकर,ज्ञानेश्वर केंद्रे आदीची यावेळी उपस्थिती होती.
About the Author
