मुखेड :
भारतीय प्रजासत्ताक दिनानिमित्त भारताच्या महामहीम राष्ट्रपती, गृह मंत्रालय व महासंचालक आरोग्य सेवा भारत यांनी माझ्या सर्पदंश कार्याची दखल घेऊन ‘रिसेप्शन ॲट होम’ या कार्यक्रमासाठी विशेष निमंत्रित करून राष्ट्रपतीभवन नवी दिल्ली येथे बहुमान केल्याबद्दल जिप्सी मॉर्निंग ग्रुपच्या वतीने जोशी इन्फोटेकच्या सभागृहात जागतिक आरोग्य संघटने सदस्य मुखेड भूषण डॉक्टर दिलीपराव पुंडे यांचा व नागपूर एम्स मधून विशेष प्राविण्यसह एमबीबीएस उत्तीर्ण केलेल्या डॉ. कु. ऋतुजा कौरवार यांचा विशेष सन्मान करण्यात आला.कार्यक्रमाच्या अध्यक्षस्थानी प्रसिद्ध हृदयरोग तज्ञ डॉ. अशोक कौरवार होते तर डॉ. रचिता कौरवार, जिप्सी मॉर्निंग ग्रुपचे अध्यक्ष जय जोशी यांची प्रमुख उपस्थिती होती. प्रारंभी सरस्वती प्रतिमा पूजन व दीप प्रज्वलन करून कार्यक्रमाची सुरुवात करण्यात आली. सत्काराला उत्तर देताना डॉ. पुंडे म्हणाले की, गोरगरीब शेतकरी आणि शेतमजूर सर्पदंश रुग्णांच्या वेदनेची संवेदना महामहीम राष्ट्रपती द्रोपदी मुर्मू आणि केंद्र शासनापर्यंत पोहचली. भारतीय प्रजासत्ताक दिनाच्या 77 व्या वर्षी राष्ट्रपती भवनातील ‘रिसेप्शन ॲट होम’ हा केवळ सोहळा नव्हता, तर तो संविधानाच्या सामर्थ्याचा जिवंत पुरावा होता. या ऐतिहासिक सोहळ्यात मुखेड सारख्या ग्रामीण भागात काम करणा-या माझ्यासारख्या डॉक्टरच्या कार्याची दखल घेऊन राष्ट्रपती भवनाचे निमंत्रण मिळणे ही केवळ वैयक्तिक सन्मानाची गोष्ट नसून ग्रामीण भागात राहून प्रतिकूल परिस्थितीला सामोरे जाऊन काम करणाऱ्या डॉक्टरांच्या कष्टांची आणि सेवाभावाची पावती आहे. यावेळी डॉ. ऋतुजा अशोक कौरवार ही नागपूर एम्स मधून एमबीबीएस विशेष प्राविण्यसह उत्तीर्ण झाल्यामुळे तीचा जिप्सीच्या वतीने विशेष सन्मान करण्यात आला. डॉ.कु.ऋतुजा कौरवार यांनी तिने एम्स नागपूर येथून एमबीबीएस ची पदवी उत्तीर्ण करण्यामागचे कष्ट व मेहनत यावेळी विशद केले. डॉ. अशोक कौरवार यांनी अध्यक्षीय समारोप करताना डॉ.पुंडे साहेबांच्या कार्याचा गौरव केला व ऋतुजा यांच्या दैदीप्यमान यशा पाठीमागची पालकांची असलेला त्याग विशद केला. कार्यक्रमाचे प्रास्ताविक ‘जिप्सी’चे अध्यक्ष जय जोशी यांनी केले. दादाराव आगलावे, बलभीम शेंडगे यांनी मनोगत व्यक्त केले. जिप्सी मॉर्निंग ग्रुपचे सचिव बालाजी तलवारे आजारातून बरे होऊन आल्यामुळे जिप्सी मॉर्निंग च्या वतीने मान्यवरांच्या शुभ हस्ते त्यांचा सत्कार करण्यात आला. कार्यक्रमाचे सूत्रसंचालन सुरेंद्र गादेकर यांनी केले तर आकाश पोतदार यांनी आभार मानले. कार्यक्रमास प्रा. डॉ. मनीषा जोशी (देशपांडे), डॉ. रामराव श्रीरामे, सचिव बालाजी तलवारे वैजनाथ दमकोंडवार, जयप्रकाश चौहान, हनुमंत गुंडावार, सुरेश उत्तरवार, अरुण पत्तेवार, राजेश भागवतकर, माधव गुंडावार, उमाकांत डांगे, गोविंद पाटील, उत्तम अमृतवार, विठ्ठल बिडवई, सागर चौधरी, श्रीकांत घोगरे, गजानन मेहरकर, बालाजी वडजे, बालाजीराव रेनगुंटवार, भार्गव जोशी, मृण्मयी जोशी यांच्यासह जिप्सीअन्स उपस्थित होते.
About the Author
