मुखेड :(दादाराव आगलावे)
अधिक मास अर्थात पुरुषोत्तम मास (धोंड्याचा महिना) निमित्त सामाजिक बांधिलकी जपत सुप्रभात मित्रमंडळ, मुखेड जि. नांदेड यांच्या वतीने एक आगळावेगळा सेवाभावी उपक्रम राबविण्यात आला. मातोश्री चॅरिटेबल ट्रस्ट पांगरा बोखारे संचलित ‘एक परिवार वृद्धाश्रम’, पळसगाव (ता. वसमत, जि. हिंगोली) येथे राहणाऱ्या ज्येष्ठ नागरिकांना पुरणपोळी, रसाळी व धोंडे या पारंपरिक पदार्थांच्या भोजनाची प्रेमळ मेजवानी देण्यात आली.
सध्या भारतीय संस्कृतीत कुटुंबव्यवस्थेमध्ये होत असलेल्या बदलांमुळे वृद्धाश्रमांची संख्या वाढत असल्याचे चित्र चिंताजनक आहे. अशा परिस्थितीत सेवानिवृत्त उपअभियंता श्री. गुलाबराव बोखारे व त्यांच्या सौभाग्यवती यांनी अत्यंत सेवाभावी वृत्तीने ‘एक परिवार वृद्धाश्रम’ यशस्वीपणे चालवत समाजापुढे एक आदर्श निर्माण केला आहे. त्यांच्या या सामाजिक कार्याचे उपस्थितांनी मनापासून कौतुक केले. सुप्रभात मित्रमंडळाचे संस्थापक अध्यक्ष डॉ. दिलीपराव पुंडे यांच्या प्रेरणेतून व मंडळाच्या सर्व कार्यकारिणीच्या पुढाकाराने हा उपक्रम आयोजित करण्यात आला.
अधिक मासाच्या निमित्ताने वृद्धाश्रमातील ज्येष्ठांच्या चेहऱ्यावर आनंद फुलविण्याचा आणि त्यांच्यासोबत आपुलकीचे क्षण व्यतीत करण्याचा प्रयत्न या माध्यमातून करण्यात आला. भोजनानंतर वृद्धाश्रमातील सदस्यांनी सुप्रभात मित्रमंडळाच्या या उपक्रमाबद्दल समाधान व्यक्त करत आशीर्वाद दिले. तसेच, अशीच सामाजिक बांधिलकी जपणारे उपक्रम सातत्याने राबवावेत, अशी अपेक्षाही व्यक्त करण्यात आली.
यावेळी वृद्धाश्रमातील सदस्यांना मेजवानी देण्याची संधी उपलब्ध करून दिल्याबद्दल श्री. गुलाबराव बोखारे व त्यांच्या सौभाग्यवती यांचे सुप्रभात मित्रमंडळाच्या वतीने विशेष आभार व्यक्त करण्यात आले. समाजातील वंचित, निराधार आणि ज्येष्ठ नागरिकांच्या सेवेसाठी अशा उपक्रमांची आज नितांत गरज असून, सुप्रभात मित्रमंडळाने अधिक मासानिमित्त राबविलेला हा उपक्रम सामाजिक संवेदनशीलतेचा आदर्श ठरत आहे.
About the Author
