मुखेड: (दादाराव आगलावे)
श्री स्वामी समर्थ सेवा अध्यात्मिक विकास व बाल संस्कार केंद्र (दिंडोरी प्रणित), केंद्र मुखेड येथे गुरुपौर्णिमा महोत्सवानिमित्त हजारो भाविकांनी मोठ्या भक्तिभावाने उपस्थिती लावत गुरुपद स्वीकारले. पहाटेपासूनच केंद्रात दर्शन, नामस्मरण व गुरुपूजनासाठी भाविकांची मोठी गर्दी झाली होती. संपूर्ण परिसर श्री स्वामी समर्थ नामघोषाने भक्तिमय झाला होता.
पौर्णिमेच्या दिवशी सकाळी ८ वाजता काकड आरती व गुरुपूजनानंतर केंद्रात राबविण्यात येणाऱ्या अठरा विभागांची सविस्तर माहिती उपस्थित भाविकांना देण्यात आली. प्रत्येक विभागाचा उद्देश, कार्यपद्धती, सेवाकार्य आणि समाजोपयोगी उपक्रम यांची माहिती विभाग प्रमुखांनी सादर केली. यामुळे नव्याने येणाऱ्या भाविकांना सेवाकार्यात सहभागी होण्याची प्रेरणा मिळाली.यानंतर सकाळपासून सायंकाळी ५ वाजेपर्यंत प्रश्नोत्तर मार्गदर्शन सत्र आयोजित करण्यात आले. या सत्रात अध्यात्म, साधना, गुरूसेवा, नामजप, दैनंदिन आचार-विचार, बालसंस्कार, समाजसेवा तसेच केंद्राच्या विविध उपक्रमांबाबत भाविकांनी विचारलेल्या प्रश्नांची समाधानकारक उत्तरे देण्यात आली.
गुरुपौर्णिमेनिमित्त आयोजित रक्तदान शिबिरालाही उत्स्फूर्त प्रतिसाद लाभला. जीवन आधार ब्लड बँक, नांदेड यांच्या सहकार्याने आयोजित या शिबिरात ५१ भाविक रक्तदात्यांनी स्वेच्छेने रक्तदान करून सामाजिक बांधिलकी जपली. रक्तपेढीचे कळणे सर यांच्या मार्गदर्शनाखाली जगदीश सोनकांबळे, अश्विनी कुडमेथे, कोमल आंबोरे, बाबासाहेब खिल्लारे व दत्ता गाडे यांनी रक्तदात्यांची आवश्यक काळजी घेत रक्तसंकलनाची प्रक्रिया यशस्वीरीत्या पूर्ण केली. यावेळी हजारो भाविकांनी गुरुपद स्वीकारून श्री स्वामी समर्थांच्या सेवाकार्यात सहभागी होण्याचा संकल्प केला. संपूर्ण दिवस भक्तिमय वातावरणात विविध धार्मिक व सामाजिक उपक्रम पार पडले. केंद्रातील १८ विभागांची माहिती केंद्रात भक्तांच्या सर्वांगीण विकासासाठी खालील विभाग कार्यरत असून त्यांची स्वतंत्र माहिती भाविकांना देण्यात आली. अध्यात्म व नामसाधना विभाग, गुरूसेवा विभाग, बालसंस्कार विभाग, युवक विकास विभाग, महिला विकास विभाग,आरोग्य सेवा विभाग, रक्तदान व अवयवदान जनजागृती विभाग,अन्नदान व अन्नपूर्णा सेवा विभाग, वृक्षारोपण व पर्यावरण संवर्धन विभाग,व्यसनमुक्ती जनजागृती विभाग, गोसेवा विभाग, आपत्ती व्यवस्थापन व समाजसेवा विभाग, ग्रंथ प्रसार व वाचन संस्कार विभाग, भजन-कीर्तन व सांस्कृतिक विभाग, ध्यान, योग व प्राणायाम विभाग, ग्रामस्वच्छता व स्वच्छता अभियान विभाग, भक्त नोंदणी व संपर्क विभाग, प्रचार-प्रसार व सेवा विस्तार विभाग या सर्व विभागांद्वारे अध्यात्माबरोबरच सामाजिक, शैक्षणिक, आरोग्य, पर्यावरण आणि संस्कारमूल्यांचा प्रसार करण्याचे कार्य सातत्याने केले जात असल्याची माहिती यावेळी देण्यात आली. गुरुपौर्णिमा महोत्सवामुळे मुखेड केंद्रात भक्ती, सेवा आणि समाजकार्याचा सुंदर संगम अनुभवायला मिळाला.
About the Author
