#नांदेड दि. २८ ऑक्टोंबर: आगामी लोकसभा पोटनिवडणूक व विधानसभा निवडणुकीत मतदारांची संख्या वाढावी यासाठी नांदेड जिल्हा प्रशासनाने जनजागृतीसाठी विशेष उपक्रम हाती घेतले आहेत. जिल्हाधिकारी तथा जिल्हा निवडणूक अधिकारी अभिजीत राऊत आणि मुख्य कार्यकारी अधिकारी तथा स्विपच्या प्रमुख मीनल करनवाल यांच्या मार्गदर्शनाखाली गुरुवार 31 ऑक्टोबर २०२४ रोजी वजीराबाद येथील मल्टीपर्पज हायस्कूलमध्ये नांदेड दक्षिण मतदार संघातील नागरिकांसाठी सकाळी 11 ते दुपारी 1 या वेळेत रांगोळी आणि चित्रकला स्पर्धेचे आयोजन करण्यात आले आहे.
मतदान जनजागृती हा या स्पर्धेचा मुख्य विषय आहे. सहभागी स्पर्धकांनी मतदानाचे महत्त्व आणि लोकशाहीच्या प्रक्रियेत त्याचा मोलाचा वाटा कसा आहे, हे चित्रकला व रांगोळी मधून दाखवून द्यायचे आहे. स्पर्धकांनी आवश्यक चित्रकला साहित्य आणि रांगोळीचे रंग स्वतः बरोबर आणायचे आहेत. चित्रकलेसाठी A4 आकाराचे ड्रॉइंग शीट लागेल. या स्पर्धेत सर्व वयोगटातील नागरिक आणि विद्यार्थ्यांना सहभागाची संधी आहे. नांदेड जिल्हा प्रशासनाने जनजागृतीच्या उद्देशाने आयोजित या स्पर्धेत अधिकाधिक नागरिकांनी सहभागी व्हावे असे आवाहन केले आहे.
०००००
#विधानसभानिवडणूक२०२४