कर्करोगावरील दीर्घकाळ चालणाऱ्या उपचार पद्धतीमध्ये रुग्णालयात संपूर्ण कुटुंब रुग्णाची साथ देते. परिणामी कुटुंबियांच्या निवासाचा प्रश्न निर्माण होतो. आजारपणातील भावनिक गुंतागुंत व संवेदना जपण्याचे केंद्र म्हणून स्वस्ती निवास ओळखले जाईल, असा विश्वास केंद्रीय गृहमंत्री अमित शाह यांनी व्यक्त केला.
केंद्रीय गृहमंत्री अमित शाह यांनी नॅशनल कॅन्सर इन्स्टिट्यूट ही संस्था देशातील प्रीमियर रिसर्च इन्स्टिट्यूट व्हावी, अशी इच्छा व्यक्त केली आहे. येत्या काळात हे ध्येय आम्ही नक्की साकारू. येथे रुग्ण आणि कुटुंबियांना सर्वोत्तम दर्जाच्या सुविधा उपलब्ध करून देण्यासाठी प्रयत्नशील असल्याचे मुख्यमंत्री देवेंद्र फडणवीस यांनी सांगितले.
केंद्रीय गृहमंत्री अमित शाह यांच्या हस्ते आणि मुख्यमंत्री देवेंद्र फडणवीस यांच्या प्रमुख उपस्थितीत जामठा परिसरातील स्वस्ती निवास या इमारतीचे भूमिपूजन तसेच कोनशिलेचे अनावरण करण्यात आले.
भारतात विशेषतः ओरल आणि सर्व्हायकल कॅन्सरचे प्रमाण चिंताजनक आहे. नागपूर शहरातील मौखिक कर्करोगाचे प्रमाण वाढल्याचे दिसून येते. यामुळे एक अत्याधुनिक उपचार केंद्राची आवश्यकता असल्याने डॉ. आबाजी थत्ते संस्थेने 2012 मध्ये 20 खाटांच्या रुग्णालयास प्रारंभ केला. डॉ. आबाजी थत्ते सेवा आणि अनुसंधान संस्थेच्या पुढाकाराने स्थापन झालेल्या राष्ट्रीय कॅन्सर इन्स्टिट्यूट, नागपूरने गेल्या काही वर्षांत मध्य भारतातील कॅन्सर उपचाराचे एक विश्वासार्ह केंद्र म्हणून आपली ओळख निर्माण केली आहे.
कॅन्सर रुग्णाचा उपचारासाठी होणारा लांबचा प्रवास आणि अपुरी निवास व्यवस्था यामुळे कर्करोगग्रस्तांच्या डॉक्टर अपॉइंटमेंट्स चुकू शकतात किंवा उपचारास विलंब होतो, ज्याचा परिणाम रुग्णाच्या उपचाराच्या सातत्यावर होतो. ही समस्या सोडविण्यासाठी डॉ. आबाजी थत्ते सेवा आणि संशोधन संस्था व्यवस्थापनाने कॅन्सर रुग्ण आणि त्यांच्या कुटुंबियासाठी निवासी सुविधा तयार करण्याची योजना आखली. ही सुविधा ‘ स्वस्ती निवास’ या नावाने ओळखली जाणार असून यातून कॅन्सर रुग्णांना उपचारादरम्यान राहण्याची सोय उपलब्ध होईल. या सुविधेमध्ये ४०० रुग्णांची आणि त्यांच्या नातेवाईकांची सुसज्ज आणि आरामदायक निवासाची सोय असेल. यामुळे कर्करुग्णांच्या उपचारात सातत्य राहून त्यांच्या उपचार खर्चातही बचत होणार आहे.
About the Author
