अहमदपूर ( प्रतिनिधी )
अहमदपूर तालुक्यातील, किनगाव व परिसरातील भाविक भक्ताचे आराध्य दैवत व श्रद्धास्थान असलेल्या श्री क्षेत्र परचंडा येथील श्री रोकडोबा देवस्थान सर्वत्र प्रसिद्ध आहे. वर्षभर दर शनिवारी दहा ते वीस किलोमीटर वरून भाविक भक्त पायी चालत येतात. येणाऱ्या भाविकांची संख्या मोठ्या प्रमाणात असते.विशेष म्हणजे या भाविकात महिला आणि बालगोपाळांची संख्या लक्षणीय असते.तर श्रावण महिन्यात दर शनिवारी भाविकांची संख्या वीस ते 25 पटीने जास्त असते.
श्रावण महिन्यात शनिवारी परचंडा येथील श्री रोकडोबा मंदिरास यात्रेचे स्वरूप असते. शनिवार दि २ ऑगस्ट २५ रोजी श्रावण महिन्यातील दुसरा शनिवार होता. यानिमित्त परचंडा येथील प्राचीन मंदिर असलेल्या श्री रोकडोबा देवस्थानात भाविकानी दर्शनासाठी हजारोच्या संख्येने गर्दी केली होती. तसे पाहता वर्षभरच दर शनिवारी भक्तांसाठी महाप्रसादाचे आयोजन करण्यात येते. अनेकजण अन्नदान करतात. काही अन्नदाते पायी येणाऱ्या भाविकासाठी जागोजागी चहा व फराळ पाण्याची सोय करतात. मंदिर समितीच्या वतीने रांगेत दर्शन घेण्यासाठी व्यवस्था करून ठिकठिकाणी स्वयंसेवक भाविकांची सोय करतात.
रोकडोबाचे दर्शन घेण्यासाठी लातूर, धाराशिव, बीड,परभणी, नांदेड, हिंगोली आणि कर्नाटक सीमा भागातून भक्त येतात. पाठीमागच्या काळामध्ये गावकऱ्यांनी मंदिरावर छत टाकण्याचा प्रयत्न केला.पण तो प्रयत्न फोल ठरला. मंदिराच्या बाजूला एक पिंपळाचे झाड आहे. त्याची एक फांदी मूर्तीवर आली आणि ती सुखायला लागली. झाड मात्र हिरवेगार होते. या मंदिराला छत नको आहे. असे मानले जाते. रोकडोबा नवसाला पावतो म्हणून आम्ही येथे पंगत देतो असे भाविक साकडे घालतात.ह भ प किशन महाराज गावकऱ्यांच्या मदतीने मंदिराचा कारभार पाहतात. सतराव्या शतकात समर्थ रामदास स्वामीचे शिष्य योगानंद गुरु यांच्या हस्ते या मूर्तीची प्रतिष्ठापना झाली आहे. या देवाचे नाव रोकडोबा असे आहे.रोकड म्हणजे नगदी, भक्तांच्या नवसाला नगदी पावणारा देव म्हणजे रोकडोबा. असी समज असून पंचक्रोशीत अशीच ख्याती आहे. या मंदिराचे वैशिष्ट्ये म्हणजे या मूर्तीवर छत नाही. ही मूर्ती तपश्चर्येला बसलेली आहे. ऊन, वारा, पाऊसाची आवश्यकता असल्यामुळे या मूर्तीला छतच नाही.
About the Author
