कंधार : प्रतिनिधी
लोहा-कंधार मतदारसंघातील माजी जिल्हा परिषद सदस्य व प्रख्यात शैक्षणिक तसेच सामाजिक कार्यकर्ते प्रा. डॉ. पुरुषोत्तम धोंडगे यांनी शिवसेना (उद्धव बाळासाहेब ठाकरे) पक्षात अधिकृत प्रवेश केला आहे. दि. १९ ऑगस्ट रोजी मुंबईतील ‘मातोश्री’ निवासस्थानी माजी मुख्यमंत्री उद्धव ठाकरे यांच्या उपस्थितीत मनगटावर शिवबंधन बांधून त्यांनी शिवसेनेत प्रवेश केला.
या वेळी लोहा, कंधार तालुक्यातून शेकडो कार्यकर्ते आणि समर्थक मोठ्या संख्येने मुंबईत दाखल झाले. शेकडो वाहनांचा ताफा घेऊन पोहोचलेल्या कार्यकर्त्यांनी ‘शिवसेना जिंदाबाद’च्या घोषणा देत उत्स्फूर्तपणे पाठिंबा दर्शविला.
पक्षप्रवेश सोहळ्यास शिवसेना नेते सचिव विनायक राऊत, विधानपरिषद विरोधी पक्षनेते अंबादास दानवे, नांदेड-हिंगोली जिल्हा संपर्कप्रमुख बबनराव थोरात, लातूर जिल्हा संपर्कप्रमुख रोहिदास चव्हाण, जिल्हाप्रमुख बालाजी रेड्डी, जिल्हा संघटक सुरेश पाटील हिलाल, उपजिल्हा प्रमुख भालचंद्र नाईक, विधानसभा समन्वयक गणेश कुंटेवार, कंधार तालुका प्रमुख परमेश्वर पाटील जाधव, लोहा तालुका प्रमुख भीमराव पाटील शिंदे, माजी सभापती व कंधार तालुका संघटक पंडित देवकांबळे, कंधार शहरप्रमुख अतुल पापीनवार आदींसह हजारो शिवसैनिक उपस्थित होते.
प्रा. डॉ. पुरुषोत्तम धोंडगे हे श्री शिवाजी मोफत एज्युकेशन सोसायटीचे अध्यक्ष असून सामाजिक कार्य युवा मंचाच्या माध्यमातून त्यांनी लोहा-कंधार तालुक्यात उल्लेखनीय सामाजिक कार्य केले आहे. शैक्षणिक, सामाजिक व राजकीय क्षेत्रात त्यांचे योगदान मोठे असून ते युवा नेते म्हणून परिचित आहेत. २०१२ मध्ये बहाद्दरपूरा जिल्हा परिषद गटातून निवडणूक लढवून ते विजयी झाले होते. त्यानंतर २०२४ च्या विधानसभा निवडणुकीत त्यांनी उमेदवारी अर्ज भरला होता; मात्र मनोज जरांगे पाटील यांच्या सूचनेनुसार त्यांनी अर्ज मागे घेतला. आता शिवसेना (उद्धव बाळासाहेब ठाकरे) मध्ये प्रवेश करून लोहा-कंधार तालुक्यातील जनतेची सेवा करण्याचा निर्धार त्यांनी व्यक्त केला आहे.
About the Author
