मुखेड: (दादाराव आगलावे)
न्यायालयीन प्रक्रियेत गतिमानता येण्याकरिता नवीन तंत्रज्ञानाचा वापर करणे काळाची गरज निर्माण झाली आहे. सर्व सामान्य पक्षकारांना न्याय देण्याची भूमिका असली पाहिजे. न्यायाधीश व वकिला मधील संबंध चांगले असले पाहिजे. न्यायालयाची विश्वासाहर्ता कमी होणार नाही याची सर्वांनी काळजी घ्यावी असे मत मुंबई उच्च न्यायालयाचे न्यायमूर्ती संदीप कुमार मोरे यांनी व्यक्त केले आहे.Mukhed Court Building Inauguration
मुखेड येथील न्यायालयीन संकुलनातील नूतन इमारतीचा उद्घाटन सोहळा रविवारी दिनांक 24 रोजी उत्साहात संपन्न झाला यावेळी ते बोलत होते. कार्यक्रमाच्या अध्यक्षस्थानी जिल्हा व सत्र न्यायाधीश श्री सुनील वेदपाठक उपस्थित होते. कार्यक्रमास प्रमुख पाहुणे म्हणून महाराष्ट्र व गोवा बार कौन्सिलचे माजी अध्यक्ष ॲड. वसंतराव साळुंके, बार कौन्सिल ऑफ इंडियाचे माजी उपाध्यक्ष ॲड.सतीश देशमुख, बार कौन्सिल ऑफ महाराष्ट्र अँड गोव्याचे सदस्य ॲड. अण्णाराव पाटील यावेळी उपस्थित होते.
कार्यक्रमास मुखेड अभिवक्ता संघाचे अध्यक्ष ॲड. गोपाळराव जाधव, सचिव ॲड. गोविंद डुमणे यावेळी उपस्थित होते.
यावेळी बोलताना न्यायमूर्ती संदीप कुमार मोरे यांनी सांगितले की, मुखेड न्यायालयाच्या नूतन इमारतीतून सर्वसामान्यांना न्याय देण्याचे काम झाले पाहिजे. न्यायालयीन प्रक्रियेत गतिमानता येण्यासाठी नवीन तंत्रज्ञानाचा वापर केला पाहिजे. सर्वसामान्य पक्षकरांना न्याय मिळाला पाहिजे ही भूमिका घेतली तर न्यायालयाबद्दल विश्वासाहर्ता निर्माण होणार आहे. आगामी काळात या इमारतीचे पावित्र्य राखून स्वच्छता बाळगावी व पक्षकारांचे हित लक्षात घेऊन काम करावे. न्यायाधीश व वकील यांच्यातील संबंध चांगले असावेत. कोणतीही वाद होणार नाहीत व समन्वयातून सर्व चांगले कामे करण्यासाठी पुढाकार घ्यावा असे आवाहन असल्याचे न्यायमूर्ती मोरे यांनी सांगितले आहे. ॲड. वसंतराव साळुंखे यांनी सांगितले की, वकिलांच्या अडीअडचणी समजून घेतल्या पाहिजे.न्यायदानाचे काम करताना वकिलांची भूमिका समन्वयाची असावी व समन्वयातून आपली कामे पूर्ण करून घ्यावी असे मत एडवोकेट सोळुंके यांनी व्यक्त केले. ॲड.सतीश देशमुख यांनी सांगितले की, वकिलांनी अभ्यास करून न्यायालयात उभे राहावे व पक्षकारांना न्याय देण्यासाठी प्रयत्न करावा. नांदेड अभिवक्ता संघाचे जिल्हाध्यक्ष ॲड.आशिष गोदमगावकर यांनी सांगितले की, कोल्हापूर खंडपीठाच्या धर्तीवर नांदेड येथे नवीन खंडपीठ स्थापन करावे अशी मागणी असल्याचे त्यांनी सांगितले. वडवणी जिल्हा बीड येथील सरकारी वकिलाने न्यायालयात आत्महत्या केली ही दुर्दैवी घटना असून त्यांच्या कुटुंबीयांना आर्थिक मदत करणे गरजेचे आहे.
न्यायाधीश वकिलांनी एकमेकांच्या अडचणी लक्षात घेऊन काम करणे गरजेचे असल्याचे मत व्यक्त केले. अध्यक्षीय समारोप करताना जिल्हा न्यायाधीश सुनील वेदपाठक यांनी सांगितले की, मुखेड येथील अभिवक्ता संघ व न्यायाधीशांच्या परिश्रमामुळे मुखेड येथे नूतन इमारत उभी झाली आहे. या इमारतीसाठी 15 कोटी 20 लाख रुपयांचा खर्च झाला आहे. आगामी काळात देगलूर येथे नूतन इमारत उद्घाटन सोहळा होणार आहे. तसेच नांदेड येथे सात मजली भव्य न्यायालयाची इमारत होणार आहे. हदगाव व किनवट येथे अतिरिक्त जिल्हा सत्र न्यायालय सुरू करण्याच्या हालचाली सुरू झालेल्या आहेत. वकिलांनी न्यायप्रणालीत सहभाग घेऊन महत्त्वाची भूमिका बजावी असे मत असल्याचे जिल्हा न्यायाधीश सुनील वेदपाठक यांनी सांगितले. यावेळी सार्वजनिक बांधकाम विभागाचे कार्यकारी अभियंता संदीप कोटलवार, विद्युत विभागाचे कार्यकारी अभियंता अमर जाधव, उप अभियंता एस. के. कासलीवाल, उपअभियंता काकडे, कंत्राटदार दाचावार व कलंत्री यांचा सत्कार करण्यात आला. न्यायमूर्ती संदीप कुमार मोरे यांचा परिचय न्यायाधीश किशोर मुंडे यांनी करून दिला आहे.Maharashtra Judiciary News
यावेळी कंधार अभियंता संघाचे अध्यक्ष ॲड. उत्तम लुंगारे, बिलोली अभिवक्ता संघाचे अध्यक्ष ॲड. एस. एल. पाटील, हदगाव अभिवक्ता संघाचे अध्यक्ष ॲड. शिवराज हळेगावकर, नायगाव अभिवक्ता संघाचे अध्यक्ष एल.एस. कुमदेवाड, धर्माबाद अभिवक्ता संघाचे अध्यक्ष ॲड. चक्रेश बनाळीकर, देगलूर अभिवक्ता संघाचे ॲड.एस. एल.बामणीकर, उदगीर अभिवक्ता संघाचे ॲड. एस. एस. हुल्ले, न्यायालयीन कर्मचारी संघटनेचे पी.एम. मगरे, शेख कलीम, नांदेडचे ॲड.प्रदीप देशमुख, नांदेड विधी सेवा समितीचे ॲड. शरद देशपांडे यांनी न्यायमूर्ती संदीप कुमार मोरे यांचा सत्कार केला. मुखेड अभिवक्ता संघाचे अध्यक्ष ॲड.गोपाळराव जाधव यांनी प्रास्ताविक केले. होट्टल येथील शिक्षक शेख यांनी बासरी वादनातून गीत गायन सादर केले.
न्यायाधीश डॉ. एस. जे. तवाशिखर, न्यायाधीश एस. जे. गायकवाड यांनी सूत्रसंचालन केले. कार्यक्रमास जिल्हा न्यायाधीश वाय. बी. गमे, शौकत घोरवडे, सुरेश घोरपडे, शिंदे, आमदार डॉ. तुषार राठोड, माजी नगराध्यक्ष बाबुराव देबडवार, डॉ. दिलीप पुंडे, डॉ. व्यंकट सुभेदार, ॲड.बळवंत पाटील बेटमोगरेकर, डॉ. श्रावण रॅपनवाड, सदाशिव गजभारे, ॲड. गुरुदत्त देशमुख सांगवीकर,ॲड.पी.जी.आगलावे, ॲड. आशिष कुलकर्णी, ॲड.संदीप कामशेटे, ॲड. माधव मरकटवाड आदीसह अनेक वकील, निमंत्रित मान्यवर कार्यक्रमास उपस्थित होते.
यावेळी नांदेड जिल्ह्यातील कंधार, देगलूर, नायगाव, धर्माबाद, हदगाव, मुखेड येथील अभिवक्ता संघाचे पदाधिकारी उपस्थित होते. नूतन इमारत उद्घाटन सोहळा समारंभाचे आभार प्रदर्शन मुखेड न्यायालयाचे जिल्हा न्यायाधीश श्री एस. पी. देशमुख यांनी केले. हा सोहळा यशस्वीतेसाठी दिवाणी स्तर वरिष्ठ न्यायाधीश श्रीमती एस. सी. पिंपळकर, न्यायाधीश किशोर मुंडे, मुखेड अभिवक्ता संघाचे पदाधिकारी, न्यायालयीन कर्मचारी यांनी पुढाकार घेतला. पोलीस निरीक्षक लक्ष्मण केंद्रे यांनी यावेळी चोख पोलीस बंदोबस्त ठेवला. सदरील इमारतीमुळे मुखेड शहराच्या वैभवात भर पडली आहे.
महत्त्वाचे मुद्दे
मुखेड न्यायालयाच्या इमारतीसाठी १५ कोटी २० लाख रुपये खर्च
आगामी काळात नांदेड येथे सात मजली भव्य न्यायालयीन इमारत उभारणार
देगलूर येथे लवकरच न्यायालयीन इमारतीचे उद्घाटन
हदगाव व किनवट येथे अतिरिक्त जिल्हा सत्र न्यायालय सुरू करण्याची तयारी
मान्यवरांचे विचार
ॲड. वसंतराव साळुंखे : “वकिलांच्या अडचणी समजून घेऊन समन्वयातून न्यायदान करावे.”
ॲड. सतीश देशमुख : “वकिलांनी अभ्यास करून न्यायालयात उभे राहावे.”
जिल्हाध्यक्ष ॲड. आशिष गोदमगावकर : “कोल्हापूर खंडपीठाच्या धर्तीवर नांदेड येथे नवीन खंडपीठ स्थापन करावे.”
जिल्हा न्यायाधीश सुनील वेदपाठक : “वकिलांनी न्यायप्रणालीत सहभाग घेऊन महत्त्वाची भूमिका पार पाडावी.”
About the Author
