कंधार : प्रतिनिधी
कंधार नगरपालिका निवडणूक 2025 आगामी निवडणुकांचा शंखनाद होताच राजकीय वातावरण चांगलेच तापू लागले आहे. नगराध्यक्षपदाचे आरक्षण सर्वसाधारण प्रवर्गासाठी सुटल्याने विविध पक्षांतर्गत हालचालींना वेग आला आहे. या पार्श्वभूमीवर राष्ट्रवादी काँग्रेस पार्टीच्या महिला प्रदेश सरचिटणीस तथा कंधार नगरपालिकेच्या माजी नगराध्यक्षा सौ. अनुसयाताई चेतन केंद्रे यांनी आमदार प्रतापराव पाटील चिखलीकर यांनी संधी दिल्यास नगराध्यक्ष पदासाठी निवडणूक लढवण्याची तयारी दर्शविली आहे.
सौ. अनुसयाताई चेतन केंद्रे या आमदार प्रतापराव पाटीफ चिखलीकर यांच्या कट्टर समर्थक व कार्यकर्त्या आहेत.यापूर्वी त्यांनी नगराध्यक्षा म्हणून जबाबदारी पार पाडली होती. त्यांच्या कार्यकाळात कंधार शहरातील पिण्याच्या पाण्याचा गंभीर प्रश्न मार्गी लागला. लिंबोटी धरणातून शहराला कायमस्वरूपी पाणीपुरवठा करण्यासाठी जलकुंभ निर्मिती प्रकल्प राबवण्यात त्यांनी पुढाकार घेतला. तसेच व्यापारी वर्गासाठी आहिल्याबाई होळकर भाजी मंडईचे बांधकाम, रस्ते-नाल्यांची कामे आणि नागरी सुविधा उपलब्ध करून देत शहर विकासात त्यांनी ठसा उमटवला.
शैक्षणिक पात्रतेच्या बाबतीतही त्या आदर्श आहेत. अनुसयाताई केंद्रे या MH-SET परीक्षा (शिक्षणशास्त्र विषयात 2025) तसेच इंग्रजी विषयात 2024 मध्ये उत्तीर्ण झाल्या आहेत. त्या डबल एम.ए. (इंग्रजी व मराठी), डी.एड, बी.एड, एम.एड आणि स्कूल मॅनेजमेंट कोर्स मध्ये प्रथम श्रेणीत उत्तीर्ण असून उच्चशिक्षित व दूरदृष्टी असलेल्या महिला म्हणून ओळखल्या जातात.
त्यांचे सासरे संत गाडगेबाबा शिक्षण संस्थेचे संस्थापक अध्यक्ष प्रा. डी.एन. केंद्रे तर पती चेतनभाऊ केंद्रे हे संस्थेचे सचिव आहेत. शैक्षणिक, सामाजिक आणि राजकीय क्षेत्रात केंद्रे कुटुंबाचे मोठे योगदान राहिले आहे.
ओबीसी प्रवर्गातील संभाव्य उमेदवार म्हणून सौ.अनुसयाताई चेतन केंद्रे यांचे नाव सध्या शहरात चर्चेत आहे. “आमदार प्रतापराव पाटील चिखलीकर यांच्या नेतृत्वाखाली कंधारच्या सर्वांगीण विकासासाठी काम करण्याचा माझा दृढ निर्धार आहे. त्यांच्या आशीर्वादाने संधी मिळाल्यास पुन्हा नगराध्यक्षपदासाठी निवडणूक लढवून कंधार शहराचा विकास साधण्याचा मी प्रयत्न करीन,” असे त्या म्हणाल्या.
कंधारच्या नगरराजकारणात अनुसयाताई केंद्रे यांची पुनरागमनाची शक्यता निर्माण झाली असून, त्यांच्या उमेदवारीमुळे निवडणुकीत नव्या समीकरणांची शक्यता राजकीय वर्तुळात वर्तवली जात आहे.
About the Author
