कंधार : (दिगांबर वाघमारे )
आगामी इयत्ता १० वी व १२ वीच्या परीक्षांच्या पार्श्वभूमीवर कॉपीमुक्त परीक्षा घेण्यासाठी आवश्यक उपाययोजना व दक्षता याबाबत कंधार तालुक्यातील सर्व परीक्षा केंद्र संचालक व केंद्रप्रमुखांची महत्त्वपूर्ण बैठक मंगळवार, दि. ४ फेब्रुवारी रोजी तहसील कार्यालय, कंधार येथे पार पडली.
ही बैठक उपविभागीय अधिकारी विलास नरवटे व तहसीलदार रामेश्वर गोरे यांच्या मार्गदर्शनाखाली आयोजित करण्यात आली होती. बैठकीत तहसीलदार रामेश्वर गोरे यांनी कॉपीमुक्त परीक्षा घेण्यासाठी प्रशासन, परीक्षा केंद्र प्रमुख व शिक्षकांची भूमिका अत्यंत महत्त्वाची असल्याचे सांगून सविस्तर मार्गदर्शन केले.
यावेळी पोलीस निरीक्षक चंद्रकांत जाधव यांनीही परीक्षेदरम्यान कायदा व सुव्यवस्था राखण्यासाठी पोलीस प्रशासनाकडून करण्यात येणाऱ्या उपाययोजनांची माहिती देत कॉपीमुक्तीसाठी सर्वांनी दक्ष राहण्याचे आवाहन केले. तसेच उस्माननगर पोलीस स्टेशनचे सहाय्यक पोलीस निरीक्षक यांनीही परीक्षेदरम्यान घ्यावयाच्या खबरदारीबाबत मार्गदर्शन केले.
बैठकीचे प्रास्ताविक गटशिक्षणाअधिकारी वसंत मेटकर यांनी केले, तर सूत्रसंचालन मन्मथ थोटे (सहशिक्षक) यांनी केले.
या बैठकीस नायब तहसीलदार उत्तम मुदिराज, नायब तहसीलदार रेखा चामणर, तालुक्यातील सर्व परीक्षा केंद्र संचालक, मुख्याध्यापक व केंद्रप्रमुख मोठ्या संख्येने उपस्थित होते. बैठकीच्या शेवटी केंद्रप्रमुख मुंडे यांनी आभार प्रदर्शन केले.
About the Author
