सुप्रभात मित्र मंडळाच्या वतीने सपत्नीक सत्कार संपन्न
मुखेड : (दादाराव आगलावे)
भारतीय प्रजासत्ताक दिनानिमित्त भारताच्या महामहीम राष्ट्रपती, गृह मंत्रालय व महासंचालक आरोग्य सेवा भारत यांनी माझ्या सर्पदंश कार्याची दखल घेऊन ‘ रिसेप्शन ॲट होम’ या कार्यक्रमासाठी विशेष निमंत्रित करून राष्ट्रपतीभवन नवी दिल्ली येथे माझा बहुमान केला. हा बहुमान म्हणजे माझे दिवंगत आईवडील, सर्व गुरुजन, माझी पत्नी सौ.माला व परिवार, पुंडे हॉस्पिटलचे सर्व कर्मचारी आणि मला सेवेची संधी दिलेल्या हजारो रुग्णांचा सन्मान होय. गोरगरीब शेतकरी आणि शेतमजूर सर्पदंश रुग्णांच्या वेदनेची संवेदना महामहीम राष्ट्रपती द्रोपदी मुर्मू आणि केंद्र शासनापर्यंत पोहचली असे प्रतिपादन जागतिक आरोग्य संघटनेचे सदस्य, मुखेड भूषण डॉ. दिलीपराव पुंडे यांनी केले.
सुप्रभात मित्र मंडळ मुखेड यांच्या वतीने आर्य वैश्य मंगल कार्यालय येथे मुखेड भूषण डॉ. दिलीपराव पुंडे व त्यांच्या सुविद्य पत्नी सौ. माला पुंडे यांचा शाल,पुष्पहार व विशेष सन्मानचिन्ह देऊन सुप्रभात मित्र मंडळाच्या वतीने सपत्नीक सत्कार करण्यात आला. त्यावेळी ते बोलत होते. कार्यक्रमाचे अध्यक्षस्थानी सुप्रभातचे ज्येष्ठ सदस्य नारायणराव बिलोलीकर हे होते तर सुप्रभात चे अध्यक्ष लक्ष्मण पत्तेवार, कार्याध्यक्ष अशोक कोत्तावार, सचिव जिवन कवटीकवार, संघटक उत्तम कुलकर्णी यांची व्यासपीठावर उपस्थिती होती. मुखेड भूषण डॉ. दिलीपराव पुंडे पुढे म्हणाले की, भारतीय प्रजासत्ताक दिनाच्या 77 व्या वर्षी राष्ट्रपती भवनातील ‘रिसेप्शन ॲट होम’ हा केवळ सोहळा नव्हता, तर तो संविधानाच्या सामर्थ्याचा जिवंत पुरावा होता. या ऐतिहासिक सोहळ्यात मुखेडसारख्या ग्रामीण भागात काम करणा-या माझ्यासारख्या डॉक्टरच्या कार्याची दखल घेऊन राष्ट्रपती भवनाचे निमंत्रण मिळणे ही केवळ वैयक्तिक सन्मानाची गोष्ट नसून ग्रामीण भागात राहून प्रतिकूल परिस्थितीला सामोरे जाऊन काम करणाऱ्या डॉक्टरांच्या कष्टांची आणि सेवाभावाची पावती आहे. राष्ट्रपती भवनात पार पडलेल्या या सोहळ्यात देशाच्या महामहीम राष्ट्रपती द्रौपदी मुर्मु, पंतप्रधान मा.नरेंद्र मोदी, भारताचे मुख्य न्यायाधीश, केंद्रीय मंत्री, परदेशी पाहुणे व विविध क्षेत्रांतील मान्यवरांची उपस्थिती होती. माझ्या 38 वर्षांच्या अविरत आरोग्यसेवेबद्दल, विशेषतः सर्पदंश रुग्णांवरील जीवनरक्षक कार्याबद्दल, सन्मानपूर्वक आमंत्रित करण्यात आले होते. मुखेडच्या गल्लीपासून सुरू झालेला माझा प्रवास राष्ट्रपती भवन आणि जागतिक आरोग्य संघटनेपर्यंत पोहोचतो, सर्पदंशाने होरपळणाऱ्या शेतकरी व शेतमजुरांच्या व्यथा मला परराष्ट्र मंत्री एस. जयशंकर, आरोग्य मंत्री जे.पी. नड्डा, अर्थमंत्री निर्मला सीतारामन, पियुष गोयल, अजित डोभाल या देशाच्या सर्वोच्च नेतृत्वासमोर मांडण्याचे भाग्य लाभले. सुप्रभात मित्र मंडळाने केलेला माझा सपत्नीक सन्मान मी कदापिही विसरून शकणार नाही. येथे काम करत असताना मी उपक्रम सुचवतो व आपण सर्वजण त्याला दुजोरा देता हे माझ्या प्रगतीचा एक विशेष टप्पा आहे. कार्यक्रमाचे प्रस्ताविक सुप्रभातचे सचिव जीवन कवटीकवार यांनी केले. यावेळी सौ.माला पुंडे, सुप्रभातचे अध्यक्ष लक्ष्मण पत्तेवार, डॉ. एम.जे. इंगोले, डॉ. आर.जी. स्वामी, शिवाजी कोनापुरे यांनी मनोगत व्यक्त केले. नारायणराव बिलोलीकर यांनी अध्यक्षीय समारोप केला. कार्यक्रमास गोपाळ पत्तेवार, डॉ. वीरभद्र हिमगिरे, नंदकुमार मडगुलवार, बालाजी देबडवार, शंभूशेठ कवटीकवार, लक्ष्मीकांत चौधरी, प्रवीण कवटीकवार, एस.पी. कपाळे, दिनेश चौधरी यांच्यासह डॉ. शारदा हिमगिरे, प्रज्वलकोत्तावार, सागर कोडगिरे,
बाळू सीतानगरे प्रमोद बच्चेवार, बालाजी पोलावार, मनोज दमकोंडवार, जगदीश पुलावर, आशिष मडगुलवार, योगेश वट्टमवार, यांची उपस्थिती होती. पशुपतिनाथ, अयोध्या, काशी यात्रेस जाणारे अशोक कोत्तावार, सो. प्रयाग कोत्तावार, नंदकुमार मडगूलवार, सौ. संगीता मडगूलवार, लक्ष्मीकांत चौधरी, सौ. गीता चौधरी, बालाजी देबडवार, सौ. सविता देबडवार, शिवाजी कोनापुरे, व सौ. गोदावरी कोनापुरे यांचा सुप्रभाच्या वतीने सन्मान करून शुभेच्छा देण्यात आल्या. कार्यक्रमाचे सूत्रसंचालन दादाराव आगलावे यांनी केले तर उत्तम कुलकर्णी यांनी आभार मानले. कार्यक्रमास महिला, पुरुष मोठ्या संख्येने उपस्थित होते. कार्यक्रम यशस्वीतेसाठी उत्तम कुलकर्णी, लक्ष्मण पत्तेवार, जीवन कवटीकवार, अशोक कोत्तावार यांनी विशेष परिश्रम घेतले.
About the Author
