कंधार : धोंडीबा बोरगावे
कंधार तालुक्यातील फुलवळ येथे महाराष्ट्र ग्रामीण बँक शाखा कंधार च्या वतीने शाखा व्यवस्थापक संदीप शिरफुले यांच्या मार्गदर्शनाखाली बँक अधिकारी सोनम गजभीये यांच्या उपस्थितीत फुलवळ येथे वित्तीय साक्षरता अभियान अंतर्गत बँक आपल्या दारी हा स्तुत्य उपक्रम राबविण्यात आला.
यावेळी महाराष्ट्र ग्रामीण बँक शाखा कंधार च्या बँक अधिकारी सोनम गजभीये तसेच कार्यालयीन कर्मचारी माधव वाघमारे , दीपाली मंगनाळे , रमजान पठाण यांची प्रमुख उपस्थिती होती.
बँक आपल्या दारी या अभियानात उपस्थित बँकेचे खातेदार व बचत गटातील महिला यांना मार्गदर्शन करताना सोनम गजभीये यांनी सांगितले की जास्तीत जास्त ग्राहकाने बँकेचे बचत खाते काढून घ्यावे , ज्यांचे बँक खाते आहेत त्यांनी वेळोवेळी बँकेसोबत व्यवहार करत जमेल तशी बचत करावी जेणेकरून अडीअडचणी च्या काळात किंवा उतरत्या वयात ती बचत आपल्या कामी पडेल , आर.डी. बचत खाते काढून त्यात बचत करावी. विशेष बाब म्हणजे आजकाल काही फेक कॉल करून आपल्याला ओटीपी मागून घेतात ते त्यांना कधीही द्यायचा नाही, कारण बँकेकडून कधीही वयक्तिक ओटीपी मागितला जात नाही.
त्याच बरोबर प्रत्येकाने आपापल्या खात्यावरून स्वतःचा अपघात विमा काढून घ्यावा . त्यात वार्षिक २० रुपयात प्रधानमंत्री सुरक्षा विमा योजना अंतर्गत २ लाख संरक्षित विमा रक्कम व वार्षिक ४३६ रुपयात प्रधानमंत्री जीवन ज्योती विमा योजनेत पण २ लाख रुपये संरक्षित विमा रक्कम आहे. असे दोन प्रकारचे अपघात संरक्षण विमे आहेत. या दोन्ही प्रकारच्या विम्यात दुर्दैवाने अपघात झालाच तर लाभार्थ्यांच्या वारसांना एकंदरीत रक्कमेचा लाभ घेता येतो.
एवढेच नाही तर वयाच्या १८ वर्षांपासून ते ४० वर्ष वयोगटातील लोकांसाठी अटल पेन्शन योजना सुद्धा चालू असून त्यात वयाच्या प्रमाणात मासिक , सहामाही व वार्षिक हप्ता आपल्या बँक खात्यातून जमा करता येतो आणि ती पेन्शन ची रक्कम वयाच्या ६० वर्षानंतर आपल्याला मिळवता येते .
अशा विविध प्रकारच्या योजना शासन आपल्यासाठी राबवत असून त्याचा आपण सर्वांनी पुरेपूर लाभ घ्यावा व उतरत्या वयातली मायापुंजी आजपासूनच जमा करण्यास सुरुवात करावी जेणेकरून वेळ गेल्यानंतर नशिबाला दोष देत बसण्यापेक्षा आजच सावध भूमिका घेऊन आपाल्या बँकेशी संपर्क साधावा आणि अशा अनेक योजनांचा लाभ घ्यावा असे पटवून सांगितले.
यावेळी गावातील जेष्ठ नागरिक , तरुण , बचत गटातील महिला आणि बँकेचे खातेदार मोठ्या संख्येने उपस्थित होते.
कार्यक्रमाच्या शेवटी बँकेच्या अधिकाऱ्यांचे व उपस्थितांचे दीपाली मंगनाळे यांनी आभार मानले.
About the Author
