प्रा. डॉ. सुरेश शिंदे यांच्या व्याख्यानाने ग्रामस्थ मंत्रमुग्ध
मुखेड: (दादाराव आगलावे)
दापका (राजा) येथे शिवजन्मोत्सव समिती, यांच्यावतीने शिवजन्मोत्सव मोठ्या उत्साहात व भक्तीमय वातावरणात साजरा करण्यात आला. या प्रसंगी आयोजित व्याख्यान कार्यक्रमात प्रमुख व्याख्याते डॉ. सुरेश शिंदे, मराठी विभागप्रमुख, छत्रपती शिवाजीराजे महाविद्यालय, उदगीर (जि. लातूर) यांनी “रयतेचे राजे : बहुजन नायक छत्रपती शिवाजी महाराज” या विषयावर सखोल व अभ्यासपूर्ण मार्गदर्शन केले.
कार्यक्रमाच्या प्रारंभी छत्रपती शिवाजी महाराजांच्या प्रतिमेचे पूजन व दीपप्रज्वलन करण्यात आले. प्रारंभी दापका (राज) चे दैवत श्री संत नामदेव महाराज यांच्या हस्ते ध्वजारोहण करण्यात आले. यावेळी उपस्थित मान्यवरांनी शिवरायांच्या कार्याला अभिवादन केले.
यावेळी मारोती पाटील तिरुकेकर व दापका (राजा) येथील शिवजन्मोत्सव समितीचे कार्यकर्ते मोठ्या संख्येने उपस्थित होते. व्याख्यानात डॉ. शिंदे यांनी शिवाजी महाराजांचे लोककल्याणकारी राज्यकारभार, बहुजन समाजाशी असलेली नाळ, न्यायप्रिय प्रशासन, स्वराज्य संकल्पना, स्त्री-सन्मान व धार्मिक सहिष्णुता यावर सविस्तर विवेचन केले. “शिवाजी महाराज हे केवळ युद्धनायक नव्हते, तर रयतेच्या सुख-दुःखाशी एकरूप होणारे लोकनायक होते,” असे त्यांनी ठामपणे मांडले. शिवरायांनी शेतकरी, कष्टकरी, सामान्य रयत यांच्या हितासाठी राबविलेल्या धोरणांची उदाहरणे देत स्वराज्य म्हणजे लोकांचे राज्य ही संकल्पना त्यांनी स्पष्ट केली. प्रशासनातील पारदर्शकता, भ्रष्टाचाराविरुद्ध कठोर भूमिका आणि सर्व घटकांना समान न्याय देण्याची तत्त्वे आजच्या पिढीसाठी मार्गदर्शक असल्याचे त्यांनी अधोरेखित केले.
कार्यक्रमास परिसरातील नागरिक, महिला, युवक, विद्यार्थी मोठ्या संख्येने उपस्थित होते. उपस्थित श्रोत्यांनी व्याख्यानाला उत्स्फूर्त प्रतिसाद दिला. शिवजन्मोत्सव समितीच्या वतीने डॉ. सुरेश शिंदे यांचा सत्कार करण्यात आला. मागील दोन दशकापासून डीजेवर चालत असलेला शिवजन्मोत्सव यंदा तरुण कार्यकर्त्यांच्या पुढाकारातून डीजेमुक्त शिवजन्मोत्सव साजरा करण्यात आला.
यावेळी गावातील प्रतिष्ठित व्यक्तींनी तरुणांचे अभिनंदन केले. संयोजन समितीकडून छ. शिवाजी महाराज यांच्या जीवन चरित्रावर भाषण स्पर्धा आयोजित करण्यात आली होती. श्री संत नामदेव महाराज विद्यालयातील विद्यार्थ्यांना सहभाग घेतला होता. यामध्ये सर्वप्रथम – कु.शीतल मोरे, द्वितीय- कु.स्वाती वाडकर, तृतीय- वैष्णवी रिंगट यांनी बक्षीशे पटकावली. तसेच छत्रपती शिवाजी महाराज व मासाहेब जिजाऊ यांच्या वेशभूषामध्ये सर्वप्रथम – श्रीकांत चंद्रकांत तेलंगे, द्वितीय – कु. सायली सरकाळे, तृतीय-शिवशक्ती सरकाळे यांनी बक्षीस हे पटकावली.
यावेळी नंदिनी तुळशीराम जोगदंड, ममता बोईनवाड, अमृता सलगरे, प्रांजली भूत्तापले, कु. दिव्या जाधव, गायत्री पंजलवाड, भक्ती जोगदंड, श्रावणी जोगदंड या विद्यार्थिनींनी उत्कृष्ट मनोगत व्यक्त केले. या शिवजन्मोत्सवाच्या निमित्ताने छत्रपती शिवाजी महाराजांचे विचार, आदर्श व कार्य नव्या पिढीपर्यंत पोहोचविण्याचे महत्त्व अधोरेखित झाले.
About the Author
