मुखेड : (दादाराव आगलावे)
गणाचार्य मठ संस्थान यांच्या वतीने आयोजित पट्टाभिषेक वर्धापन दिन कार्यक्रम भक्तिभाव व वैचारिक वातावरणात मोठ्या उत्साहात संपन्न झाला. या प्रसंगी ‘शिव तत्वज्ञान आणि सांस्कृतिक अनुबंध’ या विषयावर सखोल व अभ्यासपूर्ण व्याख्यानाचे आयोजन करण्यात आले होते.
या कार्यक्रमाचे प्रमुख व्याख्याते प्रा. डॉ. शशिकांत बसवेश्वर दरगु, सहयोगी प्राध्यापक व संस्कृत विभाग प्रमुख, नेताजी सुभाषचंद्र बोस महाविद्यालय, नांदेड हे होते. आपल्या व्याख्यानात त्यांनी शिव तत्वज्ञानाची तात्त्विक बैठक, शैव परंपरेची सांस्कृतिक परंपरा आणि भारतीय समाजजीवनाशी असलेला त्याचा अतूट अनुबंध सुस्पष्टपणे मांडला. शिवभक्ती ही केवळ उपासना नसून ती जीवनपद्धती असल्याचे त्यांनी प्रतिपादन केले.
कार्यक्रमास अध्यक्ष म्हणून सिद्धलिंग शिवाचार्य महाराज प्रमुख पाहुणे विरुपाक्ष शिवाचार्य महाराज यांची उपस्थिती लाभली. त्यांच्या उपस्थितीमुळे कार्यक्रमास आध्यात्मिक अधिष्ठान प्राप्त झाले. यावेळी नगराध्यक्षा सौ. विजया देबडवार, मुखेड भूषण डॉ. दिलीप पुंडे, डॉ. कैलास पाटील चांडोळकर, डॉ. आरती पाटील, विनोद आडेपवार, बजरंग कल्याणी, जयप्रकाश कानगूले, सौ. ऐश्वर्या गायकवाड, सौ. रंजना कोत्तापले व कू. स्नेहा तमशट्टे यांचा विशेष सत्कार करण्यात आला.
मुखेड भूषण डॉ. दिलीप पुंडे यांनी आपल्या भाषणात शिव तत्वज्ञानाचे सामाजिक उपयोजन, विज्ञान व अध्यात्म यांचा समन्वय आणि समाजघडणीतील अध्यात्मिक मूल्यांचे महत्त्व यावर सविस्तर विचार मांडले. त्यांचे विचार उपस्थित श्रोत्यांना प्रेरणादायी ठरले. कार्यक्रमाचे प्रास्ताविक डॉ. माधव पाटील उच्चेकर यांनी केले. त्यांनी पट्टाभिषेक परंपरेचे ऐतिहासिक महत्त्व आणि गणाचार्य मठ संस्थानच्या सामाजिक-सांस्कृतिक कार्याचा आढावा घेतला. विरुपाक्ष शिवाचार्य महाराज यांनी आशिर्वाद दिले. कार्यक्रमाचे सूत्रसंचालन प्रा. डॉ. चंद्रकांत एकलारे यांनी प्रभावी शैलीत केले. प्रमुख व्याख्यात्यांचा परिचय नागनाथ स्वामी यांनी करून दिला. विश्वनाथ मूंगडे यांनी आभार मानले. कार्यक्रमास विविध क्षेत्रांतील मान्यवर, अभ्यासक, शिवभक्त, महिला मोठ्या संख्येने उपस्थित होते. संपूर्ण कार्यक्रम ज्ञान, श्रद्धा व संस्कृती यांच्या संगमाने संस्मरणीय ठरला.
About the Author
