कंधार तालुक्यातील इमामवाडी येथील जिल्हा परिषद प्राथमिक शाळेच्या विद्यार्थ्यांनी अलीकडेच शैक्षणिक सहल आणि वनभोजनाचा आनंद घेतला. गावाजवळील महादेव मंदिर परिसरात ही सहल आयोजित करण्यात आली होती. या सहलीदरम्यान विद्यार्थ्यांनी परिसरातील निसर्ग, झाडे-झुडपे, पक्षी आणि वातावरणाचे निरीक्षण करत निसर्गसौंदर्याचा मनमुराद आनंद लुटला.
शालेय जीवनात विद्यार्थ्यांमध्ये शिक्षणाबद्दल आवड निर्माण व्हावी, शाळेत आनंददायी वातावरण तयार व्हावे तसेच विद्यार्थ्यांचा सर्वांगीण विकास घडावा या उद्देशाने शिक्षण विभागाच्या वतीने विविध उपक्रम राबविण्यात येतात. त्याचाच एक भाग म्हणून इमामवाडी जिल्हा परिषद शाळेने विद्यार्थ्यांसाठी ही शैक्षणिक सहल आणि वनभोजनाचे आयोजन केले होते.
महादेव मंदिर परिसरातील शांत आणि हिरव्यागार वातावरणात विद्यार्थ्यांनी खेळ, गाणी, गप्पा यांचा आनंद घेतला. सहलीमुळे विद्यार्थ्यांना निसर्गाच्या सानिध्यात वेळ घालवण्याची संधी मिळाली तसेच परस्परांमध्ये मैत्रीभाव आणि सहकार्याची भावना वाढीस लागली.
या उपक्रमासाठी शाळेचे मुख्याध्यापक संगमेश्वर पाटील कदम यांनी पुढाकार घेतला. तसेच शिक्षक यु.बी.भुरे आणि महेश जिंके, सौ.कौशल्याबाई व हनमंत मुंगरे यांनी विद्यार्थ्यांचे मार्गदर्शन करत सहलीचे नियोजन यशस्वीपणे पार पाडले. या उपक्रमामुळे विद्यार्थ्यांमध्ये उत्साहाचे वातावरण निर्माण झाले असून पालकांनीही या उपक्रमाचे कौतुक केले.
