केल्याने होते ते आधी केलेची पाहिजे या समर्थ रामदास स्वामी यांच्या उक्ती प्रमाणे फुलवळ येथील अल्पभूधारक शेतकऱ्याचा मुलगा झाला एमबीबीएस डॉक्टर..
कंधार (डी.बी.पाटील)
कंधार तालुक्यातील फुलवळ येथील अल्पभूधारक शेतकरी सुधाकर राजाराम मंगनाळे यांनी आपल्या संघर्षमय प्रवासातही आपला प्रामाणिकपणा , चिकाटी आणि काबाडकष्ट करण्याची प्रवृत्ती सातत्यपूर्णपणे पार पाडत दैनंदिन जीवनात आपण जे दिवस भोगतोय ते भविष्यात मुलांच्या नशिबी असू नयेत यासाठी रात्रंदिवस काबाडकष्ट केले , वेळप्रसंगी सालगडी म्हणून सालबंदी नोकरी केली. सोबतच मजुरी , दूध विक्री करून संसाराचा रहाटगाडा हाकतांना त्यांच्या अर्धांगिनी सौ. रेणुका सुधाकर मंगनाळे यांनी मोलाची साथ दिली. या दोघांनी मिळून आहे त्या परिस्थितीत आपल्या मुलांना जिद्दीने शिक्षण दिले. त्यांना एकूण चार अपत्य असून त्यात तीन मुली आणि एक मुलगा असे कुटुंब आहे.
त्या सर्व मुलांना चांगलं दर्जेदार शिक्षण मिळावे अशी इतर प्रत्येक पालकासारखीच याही आई-वडिलांची धडपड सुरू झाली. मुलांनाही शिक्षणाची गोडी लागली , त्यातच जसजसे मूल मोठी होऊ लागली तसतसे त्यांना आपल्या आई-वडिलांचे काबाडकष्ट आणि आपल्या भविष्याची तळमळ दिसून येऊ लागली. याच सर्व गोष्टींचा विचार करत शिवशंकर मंगनाळे ने जिद्दीच्या जोरावर अपार मेहनत घेऊन प्रयत्न करत आई-वडिलांचे स्वप्न पूर्ण करण्यासाठीचा जणूकाही चंगच बांधला. आणि इयत्ता १२ वी मध्ये व नीट मध्ये भरघोस गुण मिळवत एमबीबीएस साठी स्वतः ची निवड कशी होईल याकडे लक्ष वेधले.
शिवशंकर चे प्राथमिक शिक्षण येथीलच जिल्हा परिषदेच्या शाळेत तर माध्यमिक चे शिक्षण श्री बसवेश्वर विद्यालय फुलवळ , तर उच्च माध्यमिक चे श्री शिवाजी हायस्कूल कंधार येथे झाले. त्यानंतर एमबीबीएस डॉक्टरकीचे शिक्षण घेण्यासाठी त्याची अमरावती येथील डॉ.पंजाबराव ऊर्फ भाऊसाहेब देशमुख मेमोरियल मेडिकल कॉलेज अमरावती महाविद्यालय येथे निवड झाली आणि प्रवेश ही झाला. बघता-बघता साडेचार-पाच वर्षे कधी गेली कळलेच नाही, केल्याने होते ते आधी केलेची पाहिजे या समर्थ रामदास स्वामी यांच्या उक्ती प्रमाणे फुलवळ येथील अल्पभूधारक शेतकऱ्याचा मुलगा एमबीबीएस डॉक्टर झाला आणि नुकताच याच शिवशंकर चा डॉक्टरकीचा पदवी दीक्षांत सोहळा मोठ्या थाटामाटात अमरावती येथे संपन्न झाला. जिद्द आणि मेहनतीच्या जोरावर डॉक्टर बनून आईवडिलाचे स्वप्न केले. हा सुखद सोहळा डोळ्यादेखत पाहतांना आई-वडिलांचे डोळे आपसूकच आनंदाच्या अश्रूने पान्हावले होते.
या आनंदमय दीक्षांत सोहळ्याचे साक्षीदार झाल्याचा आनंद सर्व परिवाराला गगनात मावेनासा होता. यावेळी स्वतः शिवशंकर चे वडील सुधाकर मंगनाळे बोलतांना म्हणाले की आज माझ्या कष्टाचे चीज झाले असून आजपर्यंत मी दिवसरात्र केलेले काबाडकष्ट फळाला आल्याची भावना त्यांनी व्यक्त केली. तर डॉ. शिवशंकर मंगनाळे म्हणाले की आपण आई-वडिलांच्या कष्ठाची जाणीव ठेवत आपल्या परिस्थितीवर मात करण्यासाठी अहोरात्र मेहनत घेऊन जिद्द आणि सातत्याने प्रयत्न केले तर यश नक्कीच मिळते याचा मला चांगला अनुभव आला असून माझ्या या डॉक्टर पेशाचा गरजू , गोरगरीब जनतेसाठी नक्कीच योग्य सेवा देण्यासाठी तत्परपणे व प्रामाणिकपणे प्रयत्न करेन अशी प्रतिक्रिया दिली.
About the Author
