कंधार येथील जिल्हा परिषद हायस्कूलच्या इमारतीचे पुनर्निर्माण कार्य सध्या सुरू असून, विद्यार्थ्यांच्या उज्ज्वल भविष्यासाठी हा महत्त्वाचा टप्पा ठरत आहे. ग्रामीण व गरजू विद्यार्थ्यांना दर्जेदार शिक्षणाची सुविधा उपलब्ध करून देण्यासाठी या उपक्रमाला सर्वस्तरातून सहकार्याची गरज असल्याचे शाळेच्या वतीने सांगण्यात आले आहे.
“थेंबे थेंबे तळे साचे” या उक्तीप्रमाणे प्रत्येकाचे लहानसे योगदानही मोठा बदल घडवू शकते, असा विश्वास व्यक्त करत मुख्याध्यापिका श्रीमती गंगेश्री डोंगरे यांनी नागरिकांना भावनिक आवाहन केले आहे. शहरातील सुजाण नागरिक, शिक्षणप्रेमी, आजी-माजी विद्यार्थी व कर्मचारी यांनी या सामाजिक उपक्रमात सहभागी होऊन शाळेच्या विकासात हातभार लावावा, असे त्यांनी नमूद केले.
शाळेच्या पुनर्निर्माणासाठी आवश्यक निधी उभारणीसाठी शिक्षकांनी पुढाकार घेत क्राउडफंडिंगचा मार्ग स्वीकारला आहे. सहशिक्षक श्री मुसा शेख यांनी यासाठी QR कोड उपलब्ध करून दिला असून, नागरिकांना सुलभ पद्धतीने आर्थिक मदत करता येणार आहे. नागरिकांनी खालील प्रकारे सहकार्य करावे, असे आवाहन करण्यात आले आहेः
आपल्या पाल्यांना व नातेवाईकांच्या मुलांना शाळेत प्रवेश देणे, श्रमदान, शैक्षणिक साहित्य किंवा भेटवस्तू देणे, आर्थिक मदत करून रंगरंगोटी, वृक्षलागवड व फर्निचर उभारणीस हातभार लावणे, सोशल मीडियाच्या माध्यमातून उपक्रमाचा प्रसार करणे अशी प्रत्यक्ष अप्रत्यक्ष मदतीची अपेक्षा शिक्षकांनी ठेवली ठेवली आहे.
जिल्हा परिषद शाळांना ग्रामपंचायतीमार्फत (१५वा वित्त आयोग) निधी मिळत असला, तरी तो अनेकदा अपुरा ठरतो किंवा मर्यादित स्वरूपात उपलब्ध होतो. परिणामी शाळांचा सर्वांगीण विकास अपेक्षित गतीने होत नाही. अशा वेळी समाजातील सुजाण घटकांनी पुढाकार घेणे ही काळाची गरज असल्याचे शिक्षकांनी स्पष्ट केले.
दरम्यान, शाळेत परसबाग, खेळाचे मैदान, स्वच्छतागृह, खेळणी (TOYS), डिजिटल ग्रंथालय व आधुनिक फर्निचर यांसारख्या सुविधा उभारण्याचे उद्दिष्ट ठेवण्यात आले आहे.
या उपक्रमासाठी अधिक माहितीसाठी व सहकार्य करण्यासाठी इच्छुकांनी मुख्याध्यापिका श्रीमती गंगेश्री डोंगरे (मो. 9096806809), सहशिक्षक श्री मुसा शेख, श्रीमती अर्चना चोपडे, रविराज जाधव, शैलेशकुमार नरंगले यांच्याशी संपर्क साधावा, असे आवाहन करण्यात आले आहे.
