कंधार :(दिगांबर वाघमारे )
“बाळाचे पाय पाळण्यात दिसतात” या उक्तीप्रमाणे कंधार शहरातील कोटबाजार, अशोकनगर येथील मेहनती कुटुंबातील उदयोन्मुख बालचित्रकार रमाकांत भीमराव जोंधळे याने आपल्या कलेचा ठसा उमटवला आहे. १३५ व्या भीमजयंतीनिमित्त त्याने दोन बाय दीड फूट आकाराचे आकर्षक तैलचित्र साकारले असून त्याचे सर्वत्र कौतुक होत आहे.
सदर तैलचित्राचे विमोचन श्री शिवाजी मोफत एज्युकेशन सोसायटी, कंधारचे अध्यक्ष प्रा. डॉ. पुरुषोत्तम केशवरावजी धोंडगे यांच्या हस्ते बोधिसत्व डॉ. बाबासाहेब आंबेडकर यांच्या पूर्णाकृती पुतळ्यासमोर करण्यात आले. या प्रसंगी उपस्थित नागरिकांनी रमाकांतच्या कलेचे भरभरून कौतुक केले.
याच वेळी १३५ व्या जयंतीनिमित्त १३५ लेखणींचा हार कल्पनाकार दत्तात्रय एमेकर गुरुजी यांच्या संकल्पनेतून तयार करून डॉ. बाबासाहेब आंबेडकर यांच्या पुतळ्यास अर्पण करण्यात आला.
यानंतर श्री शिवाजी माध्यमिक व उच्च माध्यमिक विद्यालय (मराठी/उर्दू), कंधार येथे प्रार्थनेनंतर मुख्याध्यापक मुरलीधर घोरबांड व उपमुख्याध्यापक गजानन मोरे यांच्या हस्ते बालचित्रकार रमाकांत जोंधळे व दत्तात्रय एमेकर गुरुजी यांचा शाल व पुष्पहार देऊन सत्कार करण्यात आला. विद्यार्थ्यांनी यावेळी मोठ्या उत्साहाने सहभाग नोंदवला.
कार्यक्रमात प्रा. अशोकराव वरपडे, गुणवंत वाडीकर तसेच नव्याने पर्यवेक्षक पदावर बढती मिळालेले जीवन लाडेकर यांचाही सत्कार करण्यात आला.
कार्यक्रमाचे सूत्रसंचालन दत्तात्रय एमेकर यांनी केले.
About the Author
