पानभोसी (ता. कंधार, जि. नांदेड) :
ज्येष्ठ समाजसेवक व माजी आमदार ॲड. ईश्वरराव नारायणराव भोसीकर यांच्या प्रेरणादायी जीवनप्रवासावर आधारित “ईश्वर–सरस्वती : जनसेवेचा सहस्रचंद्र” हा माहितीपट रविवार, दि. ३ मे रोजी दुपारी पानभोसी येथे आयोजित सहस्रचंद्र दर्शन सोहळ्यात प्रकाशीत करून प्रदर्शित करण्यात येणार आहे. या माहितीपटाची निर्मिती ज्येष्ठ छायाचित्रकार विजय होकर्णे यांनी केली आहे.
या माहितीपटामध्ये कंधार परिसराच्या ऐतिहासिक, सांस्कृतिक आणि सामाजिक पार्श्वभूमीवर उभ्या राहिलेल्या ॲड. ईश्वरराव भोसीकर यांच्या बहुआयामी कार्याचा प्रभावी वेध घेण्यात आला आहे. त्यांच्या बालपणापासून ते अधिवक्ते, लोकप्रतिनिधी आणि समाजसेवक म्हणून केलेल्या कार्याची समग्र मांडणी यात करण्यात आली आहे.
राजकारण, शिक्षण, खादीग्रामोद्योग, जलसंधारण आणि ग्रामीण विकास या विविध क्षेत्रांत त्यांनी केलेल्या उल्लेखनीय कार्याचा आढावा या चित्रपटातून प्रेक्षकांना पाहायला मिळणार आहे. यामध्ये त्यांच्या सहवासात लाभलेले राष्ट्रीय व राज्यस्तरीय नेते, तसेच लिंबोटी धरणासारख्या महत्त्वाच्या प्रकल्पांमधील योगदान यांचाही विशेष उल्लेख करण्यात आला आहे.
तसेच या माहितीपटात त्यांच्या जीवनातील महत्त्वाचा आधारस्तंभ असलेल्या सौ. सरस्वतीबाई भोसीकर यांच्या सहजीवनातील योगदानावरही प्रकाश टाकण्यात आला आहे. “सेवा, संस्कार आणि समर्पण” या मूल्यांवर उभ्या असलेल्या या दांपत्याच्या कार्याचा वारसा आजही पुढील पिढीकडून समर्थपणे पुढे नेला जात असल्याचे चित्रपटात प्रभावीपणे मांडले आहे.
या माहितीपटाच्या निर्मितीसाठी राजेंद्र भोसीकर, संजय भोसीकर, डॉ. निळकंठ भोसीकर आणि हरि नाईकवाडे यांनी विशेष सहकार्य केले आहे, अशी माहिती निर्माते विजय होकर्णे यांनी दिली.
माहितीपटात विविध ऐतिहासिक स्थळे, धार्मिक सोहळे, तसेच प्रत्यक्ष मुलाखती (बाईट्स) यांच्या माध्यमातून कथन अधिक जिवंत करण्यात आले असून, प्रेक्षकांना एक प्रेरणादायी अनुभव देणारा हा चित्रपट ठरणार आहे.
सहस्रचंद्र दर्शन सोहळ्याच्या निमित्ताने होणारे हे प्रकाशन केवळ एका व्यक्तीच्या कार्याचा गौरव नसून, समाजसेवेच्या अखंड परंपरेचा उत्सव ठरणार असल्याची भावना आयोजकांनी व्यक्त केली आहे.
या सोहळ्यास परिसरातील मान्यवर, ग्रामस्थ, सामाजिक कार्यकर्ते तसेच विविध क्षेत्रातील नागरिकांनी मोठ्या संख्येने उपस्थित राहण्याचे आवाहन करण्यात आले आहे.
About the Author
