नवीन कार्यकारणी जाहीर करण्याचे सर्व अधिकार शंकर अण्णा धोंडगे यांना
कंधार प्रतिनिधी |
दिनांक 27 मे रोजी नांदेड येथे खासदार डॉ. श्रीकांत शिंदे यांच्या प्रमुख उपस्थितीत महत्वपूर्ण बैठक घेण्यात आली. या बैठकीत लोहा-कंधार, दक्षिण नांदेड व उत्तर नांदेड या क्षेत्रातील संघटनात्मक कामाचा आढावा घेण्यात आला. शिवसेना पदाधिकाऱ्यांच्या बैठकीत मतदारसंघनिहाय कामाचा सविस्तर आढावा घेण्यात आला.
यावेळी खासदार डॉ. श्रीकांत शिंदे यांनी सर्व कार्यकर्त्यांचे मनोगत जाणून घेत पुढील पक्ष संघटना वाढीसाठी आवश्यक सूचना दिल्या. याच बैठकीत लोहा-कंधार तालुक्यातील संपूर्ण कार्यकारणी व पदाधिकारी मंडळ बरखास्त करून नव्याने पदाधिकाऱ्यांची नियुक्ती करण्याचे सर्व अधिकार माजी आमदार तथा शिवसेना शेतकरी नेते शंकर अण्णा धोंडगे यांना देण्यात आल्याची घोषणा करण्यात आली.
या बैठकीस आमदार हेमंत पाटील, शंकर अण्णा धोंडगे, आमदार बालाजी कल्याणकर, आमदार आनंदराव बोंढारकर, संपर्कप्रमुख रमाकांत मडावी, जिल्हाप्रमुख विनय गिरडे, उमेश मुंडे तसेच निरीक्षक संजय लाखे उपस्थित होते.
चौकट
खासदार डॉ. श्रीकांत शिंदे यांनी लोहा-कंधार तालुक्यातील शिवसेनेची कार्यकारणी बरखास्त केली असून, येत्या दोन आठवड्यांत दोन्ही तालुक्यातील जुने व नवे कार्यकर्ते आणि पदाधिकाऱ्यांच्या बैठका घेण्यात येणार आहेत. सर्वांना विश्वासात घेऊन व सर्वांच्या सहमतीने नवीन कार्यकारणीची निवड करण्यात येईल, अशी माहिती शंकर अण्णा धोंडगे यांनी दिली.
ते पुढे म्हणाले की, “उपमुख्यमंत्री एकनाथराव शिंदे यांनी माझ्या कार्याची दखल घेऊन महाराष्ट्रातील शेतकऱ्यांची जबाबदारी माझ्यावर सोपवली आहे. आजपर्यंत मी सरकारविरोधात राहून शेतकऱ्यांसाठी लढा दिला आहे. मात्र, एकनाथराव शिंदे हे शेतकऱ्यांसाठी काहीतरी करू शकतात या विश्वासाने मी शिवसेनेत प्रवेश केला. लोहा-कंधार ही माझी जन्मभूमी आणि कर्मभूमी असल्याने या मतदारसंघात शिवसेनेचे भगवे वादळ निर्माण करण्याच्या उद्देशाने भविष्यात पदाधिकाऱ्यांची निवड करण्यात येईल.”
— शंकर अण्णा धोंडगे
माजी आमदार तथा शिवसेना शेतकरी नेते
About the Author
