लोहा : (दिगांबर वाघमारे )
क्रांतीज्योती सावित्रीबाई फुले यांनी शिक्षणाच्या माध्यमातून समाजपरिवर्तनाची ज्योत प्रज्वलित केली. त्यांचा आदर्श समोर ठेवून विद्यार्थ्यांनी जिद्द, परिश्रम आणि शिस्त यांच्या बळावर गुणवत्तापूर्ण शिक्षण घेऊन आपल्या कुटुंबासह समाजाचे नाव उज्ज्वल करावे, असे आवाहन माजी आमदार ईश्वरराव भोसीकर यांनी केले.
प्राथमिक व माध्यमिक आश्रम शाळा, नेहरूनगर (लिंबोटी), ता. लोहा येथे माजी आमदार ईश्वरराव भोसीकर यांच्या हस्ते विद्यार्थ्यांना शैक्षणिक साहित्य व खाऊचे वाटप करण्यात आले. यापूर्वी क्रांतीज्योती सावित्रीबाई फुले यांच्या प्रतिमेचे पूजन करून त्यांना पुष्पहार अर्पण करण्यात आला.
यावेळी विद्यार्थ्यांशी संवाद साधताना माजी आमदार भोसीकर यांनी शिक्षणाचे महत्त्व अधोरेखित करत विद्यार्थ्यांनी उच्च ध्येय ठेवून सातत्यपूर्ण परिश्रमाच्या बळावर यश संपादन करावे, असे मार्गदर्शन केले.
यावेळी माजी जिल्हा परिषद सदस्या तथा नांदेड जिल्हा महिला काँग्रेसच्या उपाध्यक्षा सौ.वर्षाताई भोसीकर यांनी आपल्या मनोगतात सांगितले की,”विद्यार्थ्यांनी नियमित शाळेत उपस्थित राहून जिद्द,मेहनत आणि शिस्त या गुणांचा अंगीकार करावा. मुलींसह प्रत्येक विद्यार्थ्याने उच्च शिक्षणाचे ध्येय ठेवून आत्मविश्वासाने पुढे वाटचाल करावी. शिक्षण हीच खरी संपत्ती असून समाजाच्या प्रगतीचा पाया शिक्षणातच आहे.विद्यार्थ्यांना प्रोत्साहन देण्यासाठी अशा उपक्रमांची सातत्याने आवश्यकता आहे.”कार्यक्रमास माजी जिल्हा परिषद सदस्या तथा नांदेड जिल्हा महिला काँग्रेसच्या उपाध्यक्षा वर्षाताई भोसीकर, संजय शिक्षण संस्था, कंधारचे उपाध्यक्ष कृष्णाभाऊ भोसीकर, मुख्याध्यापक अशोक सापनर, तानाजी मारकवाड यांच्यासह शाळेतील शिक्षक, शिक्षकेतर कर्मचारी, विद्यार्थी व पालक मोठ्या संख्येने उपस्थित होते.
कार्यक्रम उत्साहपूर्ण वातावरणात पार पडला.उपस्थित मान्यवरांच्या हस्ते विद्यार्थ्यांना शैक्षणिक साहित्य व खाऊचे वाटप करण्यात आले. यावेळी विद्यार्थ्यांनी शिक्षणाची कास धरून उज्ज्वल भविष्य घडविण्याचा संकल्प व्यक्त केला.
About the Author
