नांदेड: प्रतिनिधी
महाराष्ट्र राज्य मार्ग परिवहन महामंडळाने पर्यावरणपूरक, शंभर टक्के इलेक्ट्रिक आणि शून्य कार्बन उत्सर्जन असलेल्या ‘शिवाई’ बससेवेचा विस्तार राज्यभर मोठ्या प्रमाणात केला आहे. प्रवाशांकडून या बससेवेला चांगला प्रतिसाद मिळत असून अनेक मार्गांवर शिवाई बस नियमित धावत आहेत. मात्र या बससेवेमध्ये दिव्यांग प्रवाशांना मिळणारी प्रवास सवलत लागू नसल्याने दिव्यांगांमध्ये तीव्र नाराजी व्यक्त होत आहे.शिवाई बसमध्ये महिला, ज्येष्ठ नागरिक आणि इतर काही प्रवर्गांना शासनाच्या धोरणानुसार प्रवास सवलतीचा लाभ दिला जात आहे. मात्र दिव्यांग व्यक्तींना या सवलतीपासून वंचित ठेवण्यात आल्याने त्यांच्यावर अन्याय होत असल्याची भावना व्यक्त केली जात आहे. दिव्यांग प्रवाशांना अनेकदा उपचार, शिक्षण, नोकरी, शासकीय कामकाज तसेच दैनंदिन गरजांसाठी वारंवार प्रवास करावा लागतो. अशा परिस्थितीत शिवाई बसमध्ये सवलत उपलब्ध नसल्यामुळे त्यांच्यावर अतिरिक्त आर्थिक भार पडत आहे. दिव्यांगांच्या विविध संघटनांनी आणि प्रवाशांनी शासन व एसटी महामंडळाकडे शिवाई बसमध्येही दिव्यांगांना इतर एसटी सेवांप्रमाणे प्रवास सवलत लागू करण्याची मागणी केली आहे. राज्यात इलेक्ट्रिक बससेवेचा विस्तार होत असताना दिव्यांगांना त्यापासून वंचित ठेवणे हे सामाजिक न्यायाच्या तत्त्वाला धरून नसल्याचे मतही व्यक्त करण्यात येत आहे. दिव्यांग प्रवाशांना समान अधिकार आणि सन्मानाने प्रवास करता यावा, यासाठी शिवाई बसमध्ये तात्काळ दिव्यांग सवलत लागू करावी, तसेच आवश्यक प्रशासकीय आदेश त्वरित काढावेत, अशी मागणी दिव्यांग नागरिकांकडून जोर धरत आहे. शासन आणि एसटी महामंडळाने या मागणीची गंभीर दखल घेऊन सकारात्मक निर्णय घ्यावा, अशी अपेक्षा व्यक्त होत आहे.
About the Author
