कंधार प्रतिनिधी
घोडज ते मजरा या मार्गावर नुकताच तयार करण्यात आलेला डांबरी रस्ता अवघ्या दोन महिन्यांतच उखडू लागल्याने कामाची गुणवत्ता काय? असा प्रश्न निर्माण होत असून त्यामुळे ग्रामस्थांमध्ये तीव्र नाराजी व्यक्त होत आहे. रस्त्यावर अनेक ठिकाणी खड्डे पडले असून डांबर निघून गेल्यामुळे वाहनचालकांना जीव मुठीत धरून प्रवास करावा लागत आहे.
स्थानिक नागरिकांनी या गंभीर समस्येबाबत संबंधित प्रशासनाकडे वारंवार तक्रारी करूनही कोणतीही ठोस कारवाई करण्यात आलेली नसल्याचा आरोप केला जात आहे. रस्त्याची दुरवस्था पाहता कामाच्या दर्जाबाबतही प्रश्नचिन्ह निर्माण झाले आहे. याविषयी अनेक नागरिकांनी संबंधीत विभागाकडे लेखी व तोंडी तक्रारी केल्या परंतू कुंभकर्णी झोपेत असलेल्या प्रशासनाने याकडे साफ दुर्लक्ष करत गुत्तेदाराला अभय देत आहे.
घोडज- बोरी (खु)- मजरा हा रस्ता अनेक वर्षापासून रखडलेला होता. अनेक वर्षे मागणी करूनही या रस्याला मुहूर्त मिळत नव्हता परंतू आ.प्रताप पा. चिखलीकर यांनी पाठपुरावा करून हा रस्ता मंजूर केला. रस्ता होत असल्याने या गावातील नागरिक आनंदी झाले. रस्ता तयार झाला प्रवासाचा नागरिक आनंद घेऊ लागले. परंतू अवघ्या दोनच महिन्यांत या रस्त्यावर अनेक ठिकाणी खड्डे पडले असून वाहनधारकांना जीव मुठीत घेऊन प्रवास करावा लागत आहे.
ग्रामस्थांनी संबंधित विभागाने तातडीने रस्त्याची पाहणी करून दोषी ठेकेदारावर कारवाई करावी व दर्जेदार दुरुस्तीचे काम त्वरित हाती घ्यावे, अशी मागणी केली आहे. अन्यथा तीव्र आंदोलनाचा इशाराही नागरिकांनी दिला आहे.
About the Author
