कंधार / प्रतिनिधी
ग्रो ॲन्ड ग्लो पब्लिक स्कूल, कंधार येथील गुणवंत विद्यार्थिनी कु. मनवा मंगेश फरकंडे हिने श्रेया इंटेलिजीयंट ॲकॅडमी सर्च परीक्षा उत्कृष्ट गुणवत्तेने उत्तीर्ण करत १०० पैकी ९४ गुण मिळवून सर्व विद्यार्थ्यांमध्ये प्रथम क्रमांक पटकावला आहे. तिच्या या उल्लेखनीय यशामुळे शाळेसह कंधार शहरात आनंदाचे वातावरण निर्माण झाले आहे.मनवाने सातत्यपूर्ण अभ्यास, मेहनत आणि जिद्दीच्या बळावर हे यश संपादन केले आहे. तिच्या यशामागे आई-वडिलांचे मार्गदर्शन, शिक्षकांचे योग्य नियोजन तसेच कुटुंबीयांचे प्रोत्साहन महत्त्वाचे ठरल्याची भावना व्यक्त होत आहे. या यशामुळे ग्रो ॲन्ड ग्लो पब्लिक स्कूलच्या शैक्षणिक गुणवत्तेची आणखी एकदा प्रचिती आली आहे.
मनवाच्या या उल्लेखनीय कामगिरीबद्दल तिचे आजी, आजोबा, आई, वडील यांनी तिचे कौतुक करून पुढील शैक्षणिक वाटचालीसाठी शुभेच्छा दिल्या. तसेच शाळेतील मुख्याध्यापक, शिक्षकवृंद व शिक्षकेतर कर्मचाऱ्यांनी तिचा सत्कार करून अभिनंदन केले. भविष्यातही विविध स्पर्धा परीक्षा व शैक्षणिक क्षेत्रात असेच यश संपादन करून शाळेचे, पालकांचे आणि कंधार शहराचे नाव उज्ज्वल करावे, असा विश्वास शिक्षकांनी व्यक्त केला.
मनवा फरकंडेच्या या यशामुळे इतर विद्यार्थ्यांनाही स्पर्धा परीक्षांची तयारी करण्यासाठी प्रेरणा मिळणार असून, गुणवत्तापूर्ण शिक्षण आणि कठोर परिश्रम यांच्या जोरावर कोणतेही ध्येय गाठता येते, हा संदेश तिच्या यशातून अधोरेखित झाला आहे. तिच्या या दैदिप्यमान यशाबद्दल सर्व स्तरांतून अभिनंदनाचा वर्षाव होत असून तिच्या उज्ज्वल भविष्यासाठी शुभेच्छा दिल्या जात आहेत.
About the Author
