नांदेड-दि.21 जपान मधील कोबे शहरात सुरू असलेल्या वर्ल्ड पॅरा अथेलेटिक्स चॅम्पियनशीप स्पर्धेत गोळाफेक या क्रीडा प्रकारात नांदेडची भुमिकन्या, शिवछत्रपती पुरस्कारप्राप्त आंतरराष्ट्रीय दिव्यांग खेळाडू भाग्यश्री माधवराव जाधव हिने दुसरा क्रमांक पटकावून रौप्य पदक मिळविले आहे.
नांदेड जिल्हयातील मुखेड तालुक्यातील होनवडज येथील रहिवासी असलेली भाग्यश्री जाधव हिने दिव्यांग यांच्या राज्य, राष्ट्रीय व आंतरराष्ट्रीय पातळीवरील क्रीडा स्पर्धेत सुवर्ण, रौप्य व कास्य पदकांची लयलूट केली आहे.
दुबई येथे झालेल्या फाजा व चीन येथे झालेली ओपन चॅम्पियनशिप स्पर्धा,
बंगळूरू येथे ऑगस्ट 2022 मध्ये झालेली चौथी इंडियन नॅशनल ओपन पॅरा स्पर्धा,
नोव्हेंबर 2022 मध्ये पोर्तुगाल येथे जागतिकस्तरावर झालेली आयवॉज २०२२ जागतिक दिव्यांग क्रीडा स्पर्धा,
मार्च 2023 मध्ये उत्तर आफ्रिकेतील मोरक्को या देशात झालेली वर्ल्ड पॅरा अथेलिटिक्स ग्रॅन्ड प्रिक्स २०२३ स्पर्धा,
बंगळूरु येथे झालेली पाचवी भारतीय ओपन पॅरा अथेलिटिक्स इंटर नॅशनल चॅम्पिअनशीप-2023,
पॅरिस येथे झालेली वर्ल्ड पॅरा अथेलिटिक्स चॅम्पियनशीप स्पर्धा,
नोव्हेंबर-२०२३ मध्ये चीन येथे झालेली एशियन पॅरा गेम्स-२०२३ आदी स्पर्धांमध्ये तिने भारताचे प्रतिनिधीत्व करून पदकांची लयलूट केली आहे.
सन २०२१ मध्ये जपान मधील टोकियो येथे झालेल्या पॅरा ऑलिम्पिक क्रीडा स्पर्धेत देखील तिने चमकदार कामगिरी केली होती. डिसेंबर २०२३ मध्ये नवी दिल्ली येथे झालेल्या खेलो इंडिया या स्पर्धेत तिने दोन सुवर्ण पदकांवर आपले नाव कोरले होते. गोवा येथे ९ जानेवारी ते १३ जानेवारी २०२४ या कालावधीत झालेल्या २२ व्या राष्ट्रीय दिव्यांग क्रीडा स्पर्धेत एक सुवर्ण व एक रौप्य पदक मिळविले होते. बंगळूरू येथे २४ ते २७ मार्च २०२४ या कालावधीत झालेल्या ६ व्या इंडियन ओपन पॅरा अथलेटिक्स इंटरनॅशनल चॅम्पियनशीप स्पर्धेत सुवर्ण पदकावर तिने आपले नाव कोरले होते.
राष्ट्रीय व आंतरराष्ट्रीय स्तरावर दिव्यांग खेळाडूंच्या होणाऱ्या स्पर्धेत सहभागी होणाऱ्या भाग्यश्री जाधव यांनी नेहमीच महाराष्ट्राचे त्याच बरोबर देशाचे प्रतिनिधीत्व करून महाराष्ट्रासह देशाची शान कायम राखली आहे.
भाग्यश्री जाधव हिने प्रचंड मेहनत व जिद्दीच्या जोरावर मुख्य प्रशिक्षक सत्यनारायण (बंगळूरु), प्रशिक्षक श्रीमती पुष्पा (बंगळूरु), सहाय्यक प्रशिक्षक रविंदर सर, स्ट्रेन्थ व कंडिशनिंग प्रशिक्षक मयुर रसाळ व गुरुबंधु पालक पत्रकार प्रकाश कांबळे यांच्या मार्गदर्शनाखाली आंतरराष्ट्रीय स्तरावर आपला दबदबा कायम ठेवला आहे. या यशा बद्दल तिचे सर्वत्र कौतूक होत आहे.
माझ्या या यशात मला वेळोवेळी सहकार्य करणारे सामाजिक कार्यकर्ते, सामाजिक संघटना, मोफत वैद्यकीय उपचार करणारी डॉक्टर मंडळी व माध्यम जगतातील सर्व हितचिंतक यांचा मोलाचा वाटा आहे, अशी प्रतिक्रिया भाग्यश्री जाधव हिने व्यक्त केली.