मुखेड: (दादाराव आगलावे)
येथील पत्रकार बांधव महसूल प्रशासनास नेहमीच प्रसिद्धीच्या माध्यमातून सहकार्य करतात. पत्रकारांनी प्रशासकीय कामकाजाची सकारात्मक माहिती सर्व सामान्य नागरिकांपर्यंत पोहोचविण्याचे काम करावे. पत्रकारांची भूमिका सर्व समावेशक असावी असे मत देगलुरचे उपविभागीय अधिकारी अनुप पाटील यांनी व्यक्त केले आहे.
अखिल भारतीय मराठी पत्रकार परिषदेशी संलग्न, मुखेड तालुका मराठी पत्रकार संघाचे संपर्क कार्यालय नुकतेच सुरू करण्यात आले. या संपर्क कार्यालयास उपविभागीय अधिकारी अनुप पाटील, तहसीलदार राजेश जाधव, जिल्हा परिषद बांधकाम विभागाचे कार्यकारी अभियंता व्यंकट चव्हाण यांनी शुक्रवारी भेट दिली यावेळी ते बोलत होते.
उपविभागीय अधिकारी अनुप पाटील पुढे म्हणालेकी, मुखेड येथील पत्रकारांनी संपर्क कार्यालय सुरू केल्यामुळे सर्वसामान्य नागरिकांचे सोय झाली आहे. पत्रकारांनी स्वतःच्या जागेत पत्रकार भवन उभारण्यासाठी पुढाकार घ्यावा. महसूल प्रशासनाच्या विविध योजनेची व कार्याची माहिती सर्व सामान्य नागरिकांपर्यंत पोहोचण्याचा सकारात्मक प्रयत्न करावा असे मत अनुप पाटील यांनी व्यक्त केले. यावेळी तहसीलदार राजेश जाधव म्हणाले, की मागील तीन वर्षाच्या कालावधीत पत्रकारांनी सहकार्य केल्यामुळे मुखेडचा तहसिलदार म्हणून मला उत्कृष्ट तहसीलदार म्हणून पुरस्कार मिळाला आहे. निवडणूकीत सामंजस्य भूमिका घेऊन पत्रकारांनी प्रसिद्धी दिलेली आहे. आगामी काळात पत्रकारांच्या प्रलंबित मागण्या पूर्ण करण्यासाठी प्रयत्न करणार असल्याचे अभिवचन तहसीलदार राजेश जाधव यांनी दिले आहे. यावेळी मुखेड तालुका मराठी पत्रकार संघाच्या वतीने उपजिल्हाधिकारी अनुप पाटील, तहसीलदार राजेश जाधव यांचा सत्कार करण्यात आला. मुखेडचे भूमिपुत्र जिल्हा परिषद बांधकाम उपविभागाचे उपअभियंता व्यंकटराव चव्हाण यांची देगलूर येथे कार्यकारी अभियंता म्हणून पदोन्नती झाल्याबद्दल मुखेड तालुका मराठी पत्रकार संघाच्या वतीने त्यांचा सत्कार करण्यात आला. यावेळी प्रकाश भांगे, राजेश सुवर्णकार उपस्थित होते. पत्रकार संघाचे सचिव राजेश बंडे यांनी सूत्रसंचालन केले तर पत्रकार संघाचे अध्यक्ष महेताब शेख यांनी आभार व्यक्त केले आहे.यावेळी पत्रकार संघाचे जिल्हा उपाध्यक्ष अॅड संदीप कामशेट्टे, पत्रकार संघाचे अध्यक्ष महेताब शेख, सचिव राजेश बंडे, जेष्ठ पत्रकार यशवंतराव पाटिल बोडके, अॅड आशिष कुलकर्णी, दादाराव आगलावे, संजय कांबळे,नामदेव यलकटवार, संतोष बेळगे, दत्तात्रय कांबळे, नामदेव श्रीमंगले, जैनोदीन पटेल, शरद जोगंदड, विठ्ठल पाटील, राजु रोडगे, गणेश अंबेकरसह अंकित अग्रवाल, पवण शिरबरतल, परमेश्वर पांचाळ उपस्थित होते. पत्रकार संघाच्या कार्यालयाची पाहणी करून उपजिल्हाधिकारी व तहसीलदार यांनी कौतुक केले.
About the Author
