लोहा ; (दिगांबर वाघमारे )
दि. ९ ऑक्टोबर २०२५ रोजी जिल्हा परिषद प्राथमिक शाळा पोलीसवाडी ता लोहा शाळेवरून बदली झालेल्या शिक्षकांचा निरोप समारंभ मोठ्या उत्साहात व भावनिक वातावरणात पार पडला.
कार्यक्रमाचे अध्यक्षस्थान शा.व्य. समितीचे अध्यक्ष श्री. विठ्ठल कवडे यांनी भूषविले. तर प्रमुख पाहुणे म्हणून सरपंच श्री. तेजेराव बाजगीर, उपसरपंच श्री. मोहनराव हुगे, माजी सरपंच श्री. पिराजी धुळगंडे, श्री. लक्ष्मण कवडे आदी मान्यवर उपस्थित होते.
या कार्यक्रमात बदली होऊन इतर शाळांमध्ये रुजू झालेले शिक्षक — श्री. नागेश स्वामी, श्री. मारोती केंद्रे, श्री. शंकरराव गायकवाड, सौ. सरोदे मॅडम व सौ. सलगर मॅडम — यांचे लेझीम पथकाच्या वाजतगाजत स्वागत करण्यात आले. पुष्पवृष्टी, औक्षण व स्वागतगीताने कार्यक्रमास भावनिक सुरुवात झाली.
शाळेचे मुख्याध्यापक श्री. रामदास केंद्रे यांनी प्रास्ताविकातून निरोपमुर्ती शिक्षकांच्या कार्याचा गौरव केला. यावेळी सौदागर मॅडम, परमेश्वर तिडके सर, जालने सर, सरपंच तेजेराव बाजगीर व पिराजी धुळगंडे यांनी आपल्या भावना व्यक्त केल्या. संपूर्ण वातावरण भावनिक झाले होते.
निरोपमुर्ती शिक्षकांनीही आपल्या मनोगतातून शाळेशी असलेला जिव्हाळा व्यक्त करत “पोलीसवाडीच्या मातीचे ऋण आयुष्यभर स्मरणात राहील” अशी भावनिक साद घातली.
ग्रामपंचायत, शा.व्य. समिती, शाळेचे मुख्याध्यापक व शिक्षकवर्ग, गावकरी व विद्यार्थी यांच्या वतीने सर्व निरोपमुर्ती शिक्षकांचा भव्य सत्कार करण्यात आला.
याच कार्यक्रमात नव्याने रुजू झालेले शिक्षक — श्री. रामदास केंद्रे, सौ. निताताई केंद्रे, सौ. नर्मदा हंबीर व श्री. बालाजी आरसुलवाड — यांचा सहृदय स्वागत सत्कार करण्यात आला.अतिशय सहृदय, उत्साही व भावनिक वातावरणात हा निरोप समारंभ सोहळा अविस्मरणीय ठरला.
About the Author
