नांदेड (प्रतिनिधी)
नांदेड जिल्ह्याचे लोकप्रिय खासदार रवींद्र पाटील चव्हाण यांनी MRS महाराष्ट्र राज्य समिती संस्थापक शेतकरी नेते व माजी आमदार शंकरअण्णा धोंडगे यांची त्यांच्या काबरा नगरी येथील निवासस्थानी भेट घेऊन दिवाळीच्या निमित्ताने सदिच्छा व्यक्त केली. या भेटीने जिल्ह्याच्या राजकीय वर्तुळात नव्या समीकरणांची चर्चा सुरू झाली आहे.
अलिकडेच कंधार येथे आयोजित कार्यकर्त्यांच्या मेळाव्यात शंकरअण्णा धोंडगे यांनी आगामी निवडणुकीत महाविकास आघाडी तसेच मित्र पक्षांसोबत युती करण्याची घोषणा केली होती. त्या पार्श्वभूमीवर खासदार चव्हाण यांची ही भेट “मैत्रीचा हात पुढे आल्याचे” प्रतीक मानली जात आहे.
भेटीदरम्यान नांदेड जिल्हा काँग्रेस कमिटीचे अध्यक्ष माजी आमदार हणमंतराव पाटील बेटमोगरेकर, काँग्रेसचे ज्येष्ठ नेते अनिल मोरे, तसेच माजी जिल्हा परिषद उपाध्यक्ष व युवानेते दिलीप दादा धोंडगे, युवानेते शिवराज दादा धोंडगे, दिगंबर पाटील दांडेगावकर यांच्यासह अन्य कार्यकर्ते उपस्थित होते. या प्रसंगी खासदार चव्हाण यांचा सत्कार शंकरअण्णा धोंडगे यांच्या हस्ते करण्यात आला.
दरम्यान, आगामी जिल्हा परिषद निवडणुकीत कलंबर सर्कलमधून सौ. पुष्पाताई शिवराज धोंडगे, (शंकरअण्णा धोंडगे यांच्या सुनबाई व शिवराज धोंडगे यांच्या पत्नी) उमेदवारी अर्ज दाखल करण्याची शक्यता व्यक्त केली जात आहे. त्यामुळे या सदिच्छा भेटीला आगामी निवडणुकीच्या दृष्टीने विशेष महत्त्व प्राप्त झाले आहे.
राजकीय विश्लेषकांच्या मते, MRS आणि महाविकास आघाडीमधील संभाव्य युतीमुळे नांदेड जिल्ह्यातील राजकारणात नवा रंग भरला असून, या भेटीनंतर स्थानिक पातळीवरील राजकीय घडामोडींना वेग येण्याची शक्यता आहे.
About the Author
