कंधार ; (दिगांबर वाघमारे)
कंधार तालुक्यातील जिल्हा परिषद निवडणुकीची सरगर्मी दिवसेंदिवस वाढत असून प्रत्येक गटात राजकीय समीकरणे वेगाने बदलत आहेत. तालुक्यातील सहा जिल्हा परिषद गटांपैकी पाच गट सर्वसाधारण प्रवर्गासाठी तर कौठा हा एकमेव गट अनुसूचित जाती महिलांसाठी राखीव आहे. या गटातून कोण उमेदवार मैदानात उतरणार याकडे सर्वांचे लक्ष लागले असताना, सौ. सुनीता शिवा कांबळे (हळदेकर) या कौठा-बारुळ सर्कलसाठी संभाव्य उमेदवार म्हणून जोरदार चर्चेत आहेत.
सौ. सुनिता कांबळे यांनी नुकत्याच कौठा व धानोरा गावांमध्ये दौरे करून ग्रामस्थांशी संवाद साधला. प्रतिष्ठित नागरिक व स्थानिक मान्यवरांच्या भेटी घेत त्यांच्या अडचणी जाणून घेतल्या. ग्रामस्थांकडून त्यांना उत्स्फूर्त प्रतिसाद मिळाल्याचे दिसून आले.
सौ. सुनीता कांबळे या राष्ट्रपती पुरस्कार प्राप्त शिक्षक शिवा कांबळे यांच्या पत्नी असून, अभिजीत हळदेकर यांच्या मातोश्री आहेत. हळदा गावच्या रहिवासी असलेल्या कांबळे यांचे कौठा सर्कलमध्ये चांगले संपर्कजाळे असून सामाजिक कार्यातून त्यांनी आपली ओळख निर्माण केली आहे. त्यामुळे स्थानिकांमध्ये त्यांच्या नावाला मोठी पसंती मिळत असल्याचे दिसून येते.
राजकीय, सामाजिक कार्याचा अनुभव आणि लोकाभिमुख दृष्टिकोन लक्षात घेता, कौठा सर्कलमधून सौ. सुनीता शिवा कांबळे (हळदेकर) या जिल्हा परिषद निवडणुकीत विजयाच्या मजबूत दावेदार म्हणून समोर येत आहेत.
“आजपर्यंतचा प्रामाणिक सामाजिक प्रवास सोबतीला घेऊन लोकसेवेसाठी पुढे पाऊल टाकले आहे, कौठा सर्कलच्या विकासाला गती देण्यासाठी आशीर्वाद असावा,” असे सौ कांबळे म्हणाल्या.
About the Author
