नांदेड : दिवाळी म्हटली की गोडधोड जेवण, नवे कपडे, फटाक्यांची आतषबाजी आणि घराघरात लखलखणारा उजेड — अशी चित्रे डोळ्यांसमोर येतात. परंतु समाजातील अनेक गोरगरीब, वंचित आणि भटक्या कुटुंबांच्या घरात दिवे पेटविण्यासाठी तेल नसते, पोटाची भूक भागवणे हाच त्यांचा खरा संघर्ष असतो. अशा लोकांसाठी दिवाळी हा सण नसून, आणखी एक सामान्य दिवस ठरतो. मात्र या दिवाळीत राष्ट्रपती पुरस्कारप्राप्त शिक्षक शिवा कांबळे यांनी या अंधारात थोडासा प्रकाश पेरण्याचा सुंदर प्रयत्न केला.
नांदेड शहरातील त्यांच्या फकिरा निवासस्थानी हा उपक्रम घेण्यात आला. नांदेड शहरात पोटाची खळगी भरण्यासाठी आलेल्या कर्नाटकातील पोतराज रमेश शिंदे व भटक्या समाजातील काही कुटुंबांना शिवा कांबळे यांनी स्वतःच्या घरी पाहुण्यासारखे आमंत्रित केले. त्यांचा मनापासून सत्कार करत त्यांच्यासाठी गोडधोड पदार्थ बनविण्यात आले. नव्या कपड्यांची भेट देऊन, पारंपरिक ओवाळणी करून या परिवारांना भाऊबीजेच्या निमित्ताने ‘खरी’ दिवाळी साजरी करण्याचा आनंद मिळवून दिला. शिवा कांबळे सामाजिक बांधिलकी जपणारे ते एक उपक्रमशील शिक्षक आहेत .आज पर्यंत त्यांनी असे अनेक नाविन्यपूर्ण उपक्रम राबविले जात आहेत. त्यांच्या या आगळ्यावेगळ्या उपक्रमाचे सर्वत्र कौतुक होत आहे.
या आगळ्यावेगळ्या दिवाळी कार्यक्रमाला राज्यसभेचे खासदार डॉ. अजित गोपछेडे हेही विशेष उपस्थित होते. त्यांनी शिवा कांबळेंच्या या सामाजिक संवेदनशीलतेचे कौतुक करत सांगितले की, “समाजात अशी माणुसकी टिकवून ठेवणारे शिक्षक म्हणजे खरी प्रेरणा आहेत.”
शिवा कांबळे यांच्या या उपक्रमामुळे भटक्या पोतराज समाजातील अनेक कुटुंबांच्या चेहऱ्यावर आनंदाचे हास्य फुलले. दिव्यांच्या उजेडासह मनामनातही उजळणारी ही दिवाळी समाजाला माणुसकीची खरी ओळख करून देणारी ठरली आहे. असे गौरवोद्गार त्यांनी काढले.
तसेच खासदार डॉ .गोपछेडे यांनी अशा भटक्या कुटुंबांना कागदपत्राची पूर्तता झाल्यानंतर शासनाच्या योजनेतून हक्काचे घरकुल, वीज आणि गॅस जोडणी देण्याचे आश्वासन त्यांनी दिले. यावेळी लसाकम चे एन.जी.पोतरे, दैनिक लोकमतचे उपसंपादक भारत दाढेल तसेच त्यांच्या परिवारातील अनेक मंडळी उपस्थित होते.
About the Author
