कंधार : ( दिगांबर वाघमारे )
कंधार तालुक्यातील पाताळगंगा येथील जिल्हा परिषद प्राथमिक शाळा दोन शिक्षकांच्या जिद्दीमुळे पुन्हा भरारी घेत आहे. मुख्याध्यापक संभाजी कंधारे व सहशिक्षक मदन घुगे यांनी तन–मन लावून अध्यापन करत पालकांचा विश्वास संपादन केला. विद्यार्थीसंख्या घटून बंद पडण्याच्या मार्गावर असलेली शाळा आज गुणवत्तापूर्ण शिक्षणामुळे चर्चेत आली आहे. विद्यार्थ्यांनी सर्व विषयांत, विशेषतः इंग्रजीत लक्षणीय प्रगती केली आहे. शिक्षकांच्या कार्याची दखल घेत ग्रामपंचायतीने शैक्षणिक साहित्य देण्यासह प्रवेश घेणाऱ्या विद्यार्थ्यांचा शैक्षणिक खर्च उचलण्याची घोषणा केली आहे.
पूर्वी सातवीपर्यंत असलेली ही शाळा विविध कारणांमुळे चौथीपर्यंतच मर्यादित राहिली होती. विद्यार्थीसंख्या घटल्याने शाळा मोडकळीस आली होती आणि बंद होण्याची भीती निर्माण झाली होती. मात्र, नव्याने रुजू झालेले मुख्याध्यापक संभाजी कंधारे व सहशिक्षक मदन घुगे यांनी या शाळेचे चित्रच पालटून टाकले.
या दोन्ही शिक्षकांनी केवळ वर्गात अध्यापन न करता पालकांशी थेट संवाद साधला, त्यांना विश्वासात घेतले आणि “विद्यार्थी आमच्याकडे द्या, आम्ही दर्जेदार शिक्षण देऊ” हे आश्वासन तळमळीने दिले. त्यांच्या कार्यपद्धतीवर विश्वास ठेवून अनेक पालकांनी पुन्हा जिल्हा परिषद शाळेकडे वाटचाल केली.आज या शाळेतील विद्यार्थी सर्वच विषयांत प्रगती करत असून विशेषतः इंग्रजी विषयातही उल्लेखनीय सुधारणा दिसून येत आहे. अभ्यासाबरोबरच विद्यार्थ्यांचा आत्मविश्वास वाढल्याने पालकांमध्ये समाधानाचे वातावरण आहे. विद्यार्थी शाळेत रमू लागल्याने शाळेचा उत्साहही वाढला आहे.
या शिक्षकांच्या मेहनतीची दखल घेत ग्रामपंचायतही पुढे सरसावली आहे. शाळेसाठी आवश्यक शैक्षणिक साहित्य देण्याचा निर्णय घेण्यात आला असून, प्रजासत्ताक दिनाच्या कार्यक्रमात उपसरपंच बालाजी चुक्कलवाड यांनी मोठी घोषणा केली.
जिल्हा परिषद शाळेत प्रवेश घेणाऱ्या विद्यार्थ्यांचा संपूर्ण शैक्षणिक खर्च ग्रामपंचायत उचलणार, अशी ग्वाही त्यांनी दिली.कधीकाळी बंद पडण्याच्या उंबरठ्यावर असलेली पाताळगंगा येथील जिल्हा परिषद शाळा आज दोन शिक्षकांच्या जिद्द, प्रामाणिकपणा आणि कर्तव्यभावनेमुळे आदर्श ठरत आहे.शिक्षक काय करू शकतो, याचे हे जिवंत उदाहरण ठरत आहे.
About the Author
