नांदेड : होळीच्या पार्श्वभूमीवर आयोजित करण्यात आलेले २६ वे महामूर्ख कवी संमेलन यंदा विशेष ठरले. या संमेलनाच्या २६ वर्षांच्या इतिहासात प्रथमच एका स्त्री कवयित्रीने सहभाग नोंदवून इतिहास रचला. ॲड. दिलीप ठाकूर यांच्या संकल्पनेतून साकारलेल्या या रंगतदार आनंदसोहळ्यात महाराष्ट्राची फटाकडी गायिका ज्योती शिंदे यांनी आपल्या शृंगारिक आणि द्विअर्थी रचनांनी हजारो नांदेडकरांना मंत्रमुग्ध केले.
होलिका उत्सव समिती तर्फे सोमवारी नवा मोंढा नांदेड येथील कृषी उत्पन्न बाजार समितीच्या मैदानावर या संमेलनाचे आयोजन करण्यात आले होते. उद्घाटक म्हणून मार्केट कमिटीचे सभापती संजय लहानकर तसेच अध्यक्ष, जिल्हा परिषद कर्मचारी नेते बाबुराव पुंजरवाड यांच्या हस्ते गर्दभराजांना पुष्पहार अर्पण करण्यात आला. विशेष अतिथी उपमहापौर दीपकसिंह रावत, उद्योजक शिवप्रसादजी राठी व कुबेरनगरीचे संचालक सतीश सुगनचंदजी शर्मा यांच्या हस्ते तृतीयपंथीयांच्या गळ्यात मोत्याची माळ घालून अनोख्या पद्धतीने संमेलनाचे उद्घाटन करण्यात आले.
प्रमुख अतिथी म्हणून नागेश शेट्टी, अंबादास लालपोतू, आनंद साताळे, जुगलकिशोर शुक्ला, व्यंकट मोकळे, विजय पोकर्णा, प्रवीण साले, योगेश जायस्वाल, नवल पोकर्णा, सरदार रविंद्रसिंघ बुंगई, सेवकसिंघ जहागीरदार, शिवाजी ईबितवार, छोटा बंडू पावडे, चिंटू हरकारे, हरिभाऊ पावडे, राजू लालवानी, बंटी अग्रवाल, प्रकाशसिंह परदेशी, प्रमोद हिबारे, सुभाष देवकत्ते, एकनाथ टेकाळे, सुमेर राजपुरोहित यांचा सुरेश लोट व पंढरीनाथ बोकारे यांच्या हस्ते खारीक-खोबऱ्याची माळ व जोकर टोपी देऊन सत्कार करण्यात आला.
प्रास्ताविक करताना संयोजक दिलीप ठाकूर यांनी बनारसनंतर फक्त नांदेडमध्येच ही परंपरा सुरू असून दरवर्षी नवीन प्रयोग करण्याचा मानस असल्याचे सांगितले.पुढच्या वर्षी बिग बॉसचा उपविजेता “ प्रणित मोरे यांचा द अश्लील शो ” आयोजित करणाचा प्रस्ताव विचाराधीन आहॆ. त्यासाठी नांदेडकरांनी यु ट्यूब वर पाहून आपल्या प्रतिक्रिया कळवाव्या असे आवाहन केले.
उदघाटणानंतर महाराष्ट्राचे गायक व गीतकार एकनाथ माळी आणि ज्योती शिंदे यांची रंगतदार द्विअर्थी जुगलबंदी रंगली. दोन्ही बाजूंच्या प्रत्येकी दहा कलाकारांनी एकापेक्षा एक सरस शृंगारिक रचना सादर करून प्रचंड संख्येने जमलेल्या उपस्थितांची मने जिंकली.रुपवती ज्योती शिंदे यांनी आपल्या मधाळ आवाजात सादर केलेल्या खट्याळ रचनांनी रसिकांच्या डोळ्यांचे पारणे फेडले. झी हास्यसम्राट सिद्धार्थ खिल्लारे यांच्या चावट पॅरोडीला प्रेक्षकांनी उत्स्फूर्त प्रतिसाद दिला. शाहीर रमेश गिरी, लच्छु देशमुख व विलास जोगदंड यांनी विनोदी शैलीत सादरीकरण करून वातावरण रंगतदार केले.
कार्यक्रमाचे सूत्रसंचालन मिमिक्री किंग सतीश कासेवार व दिलीप ठाकूर यांनी मार्मिक शैलीत केले. यावर्षी महामूर्ख कवी संमेलनाला नांदेडकरांनी प्रचंड प्रतिसाद दिला. सर्वोच्च न्यायालयाच्या निर्देशानुसार रात्री दहा वाजता कार्यक्रम समाप्त करण्यात आला.
महामूर्ख कवी संमेलन यशस्वी करण्यासाठी कामाजी सरोदे, राजू मोरे, राजेशसिंह ठाकुर, सुरेश शर्मा, अरुण काबरा, संतोष भारती, प्रकाश उंटवाले , जगतसिंह ठाकूर, धरमसिंह परदेशी, प्रभुदास वाडेकर, महेंद्र शिंदे, सुरेश निल्लावार यांनी परिश्रम घेतले.होळीनिमित्त मनातील कोंडलेले विचार मोकळेपणाने मांडण्याची भारतात पुरातन काळापासून सुरू असलेली परंपरा मोबाईलच्या युगातही जिवंत ठेवल्याबद्दल ॲड. दिलीप ठाकूर यांचे सर्व स्तरांतून कौतुक होत आहे.(छाया : करणसिंह बैस, ज्ञानेश्वर सुनेगावकर, नरेंद्र गडप्पा, धनू कुलकर्णी)
About the Author
