कंधार तालुक्यातील ग्रामीण भागातील जनगणना प्रक्रिया प्रभावीपणे पूर्ण करण्यासाठी प्रशासनाने मोठी तयारी केली असून पर्यवेक्षक 65 व प्रगणक 390 अशा एकूण 455 कर्मचाऱ्यांची नियुक्ती करण्यात आली आहे. या कर्मचाऱ्यांमध्ये शिक्षक तसेच ग्राम महसूल अधिकाऱ्यांचा समावेश आहे.
या पार्श्वभूमीवर जनगणना प्रशिक्षणाची सुरुवात आज दिनांक 27 एप्रिल 2026 रोजी स्वामी रामानंद तीर्थ अध्यापक महाविद्यालय, बाळांतवाडी (ता. कंधार) येथे सकाळी 9:30 वाजता करण्यात आली. प्रशिक्षणाचा हा पहिला टप्पा असून संपूर्ण प्रशिक्षण तीन टप्प्यांत पूर्ण करण्यात येणार आहे. विशेष म्हणजे पहिल्या टप्प्यातील 150 पैकी सर्व 150 प्रशिक्षणार्थी उपस्थित राहिल्याने प्रशिक्षणाला उत्स्फूर्त प्रतिसाद मिळाल्याचे दिसून आले.प्रशिक्षणाचा शुभारंभ तहसीलदार रामेश्वर गोरे यांच्या मार्गदर्शनाखाली झाला.
प्रशिक्षणाचे प्रमुख म्हणून नायब तहसीलदार नंदकिशोर भोसिकर व नायब तहसीलदार रेखा चामणर कार्यरत असून त्यांनी प्रशिक्षणार्थींना जनगणनेचे महत्त्व, प्रक्रिया व जबाबदाऱ्या याबाबत सविस्तर मार्गदर्शन केले. प्रशिक्षणादरम्यान पर्यवेक्षक व प्रगणकांना प्रभावी मार्गदर्शन मिळावे यासाठी 6 मार्गदर्शकांची नियुक्ती करण्यात आली आहे. तसेच प्रशिक्षणस्थळी वैद्यकीय पथकाचीही व्यवस्था करण्यात आली असून सहभागींच्या आरोग्याची काळजी घेतली जात आहे.
हे प्रशिक्षण यशस्वी करण्यासाठी सुरेश सातपुते (महसूल अधिकारी), शाहजी निकम (ग्राम महसूल अधिकारी), सहशिक्षक पांडुरंग झेलेवाड, संगणक चालक नितीन सुर्वे तसेच इतर महसूल सेवक यांनी परिश्रम घेतले. कंधार तालुक्यातील जनगणना प्रक्रिया अचूक व पारदर्शक पद्धतीने पार पडावी यासाठी प्रशासनाने केलेली ही नियोजनबद्ध तयारी कौतुकास्पद मानली जात आहे.
