तालुक्यातील हाडोळी येथे दि.26 रोजी रात्री दीड क्विंटल वजनाची मगर शेतकरी रोहीदास गोविंद गायकवाड यांच्या शेतात आढळल्याने परिसरात काही काळ भीतीचे वातावरण निर्माण झाले. स्थानिक नागरिकांनी तात्काळ माहिती दिल्यानंतर सर्पमित्र व मगर रेस्क्यू स्पेशालिस्ट सिद्धार्थ काळे तसेच वन विभागाच्या पथकाने घटनास्थळी धाव घेत मगरीला सुरक्षितरीत्या पकडले.
सिद्धार्थ काळे यांना रात्री सुमारे नऊच्या सुमारास फोन आला. त्यानंतर त्यांनी आवश्यक सर्व रेस्क्यू साहित्य—टॉंग, स्ट्रेचर, हेड टॉर्च, दोरी, कटर—घेऊन सहकारी नादान शेख व संतोष वाघमारे यांच्यासह तातडीने घटनास्थळी पोहोचले. मगरीची जागा अत्यंत अवघड असल्याने बचावकार्य करताना मोठी कसरत करावी लागली. ही मगर पुलाच्या आसपास बंधारा परिसरात यापूर्वी आढळली होती. परंतू पाणी जास्त असल्याने रेस्क्यू करता आले नव्हते . परत दि. 26 रोजी पाईपमध्ये अडकलेली असल्यामुळे तिला बाहेर काढण्यासाठी विशेष दक्षता घ्यावी लागली. जवळपास तीन तासांच्या अथक प्रयत्नांनंतर अखेर मगरीला सुरक्षित पकडण्यात यश आले. ही कारवाई मध्यरात्री साडेबारा वाजण्याच्या सुमारास पूर्ण झाली.
वन विभागाच्या पथकाने पुढील कार्यवाही करत मगरीला सुरक्षित ठिकाणी सोडण्याची प्रक्रिया पूर्ण केली . यापूर्वी लोहा तालुक्यात मगर पकडली होती हि दुसरी घटणा आहे.दरम्यान या घटनेमुळे नागरिकांनी सतर्क राहण्याचे आवाहन करण्यात आले आहे.
