कंधार : दिगांबर वाघमारे
कंधार येथील जगतुंग क्रिकेट अकॅडमीच्या वतीने आयोजित करण्यात आलेल्या पहिल्यावहिल्या उन्हाळी क्रिकेट प्रशिक्षण शिबिराचा उत्साहपूर्ण वातावरणात समारोप झाला. अकॅडमीचे संचालक व प्रशिक्षक विजय राठोड यांच्या संकल्पनेतून आयोजित करण्यात आलेल्या या शिबिराला खेळाडू व पालकांचा उत्स्फूर्त प्रतिसाद लाभला.
दि. 26 एप्रिल ते 11 जून या कालावधीत Grow n Glow Public School, कंधार येथील मैदानावर हे शिबिर पार पडले. शिबिरात सुमारे 70 ते 80 विद्यार्थ्यांनी लेदर क्रिकेटचे शास्त्रशुद्ध प्रशिक्षण घेतले. फलंदाजी, गोलंदाजी, क्षेत्ररक्षण तसेच सामन्यातील तांत्रिक बाबींचे मार्गदर्शन खेळाडूंना देण्यात आले.
प्रशिक्षणादरम्यानच नांदेड येथील श्री गुरु गोविंदसिंगजी स्टेडियम येथे झालेल्या महापौर चषक स्पर्धेत अकॅडमीच्या खेळाडूंनी उल्लेखनीय कामगिरी करत आपली गुणवत्ता सिद्ध केली.शिबिराचा समारोप ‘जगतुंग चषक’ क्रिकेट स्पर्धेने करण्यात आला. या स्पर्धेत सूरज 11, शैलेश 11, तन्वीर 11 आणि अमित 11 या चार संघांनी साखळी पद्धतीने एकूण आठ सामने खेळले. दि. 10 ते 13 जून दरम्यान रंगलेल्या या स्पर्धेतील अंतिम सामना अत्यंत चुरशीचा ठरला. अमित 11 संघाने तन्वीर 11 संघावर 9 धावांनी मात करत जगतुंग चषकावर आपले नाव कोरले.
या संपूर्ण शिबिराच्या यशस्वी आयोजनात पालकांनी महत्त्वाची भूमिका बजावली. शिवाजी चौकटे, व्यंकटेश चौधरी, भागवत पदकोंडे, नागोराव ताटे यांच्यासह अनेक पालकांनी मुलांना प्रोत्साहन देत शिबिराच्या यशात मोलाचा वाटा उचलला.स्पर्धेच्या अंतिम सामन्यानंतर पारितोषिक वितरण सोहळा उत्साहात पार पडला. Grow n Glow Public School, कंधारचे संस्थापक शंतनु कैलासे यांच्या हस्ते विजेत्या व उपविजेत्या संघांना तसेच उत्कृष्ट खेळाडूंना पारितोषिके प्रदान करण्यात आली.
पहिल्याच वर्षी आयोजित करण्यात आलेल्या या प्रशिक्षण शिबिरामुळे कंधार परिसरातील क्रिकेटप्रेमी विद्यार्थ्यांना दर्जेदार प्रशिक्षणाची संधी मिळाली असून, भविष्यातही अशाच उपक्रमांच्या माध्यमातून ग्रामीण भागातील क्रिकेट प्रतिभेला व्यासपीठ उपलब्ध करून देण्याचा निर्धार आयोजकांनी व्यक्त केला.
About the Author
