कंधार ( दिगांबर वाघमारे )
महात्मा फुले माध्यमिक व उच्च माध्यमिक विद्यालयाच्या सन 2004 च्या बारावी उत्तीर्ण माजी विद्यार्थ्यांच्या वतीने विद्यालयाचे माजी प्राचार्य मोतीभाऊ केंद्रे यांच्या सेवापूर्तीनिमित्त भव्य गौरव सोहळ्याचे आयोजन करण्यात आले. कंधार येथील न्य. दुर्गा रिसॉर्ट येथे आयोजित या कार्यक्रमाला माजी विद्यार्थी, शिक्षक, विविध क्षेत्रातील मान्यवर तसेच कुटुंबीय मोठ्या संख्येने उपस्थित होते.यावेळी सन 2004 च्या बॅचमधील भारतीय सैन्यातून सेवानिवृत्त झालेले माजी सैनिक गजानन हेंडगे, गुणवंत गुट्टे आणि कैलास मोरे यांचाही विशेष सन्मान करण्यात आला. देशसेवेत त्यांनी दिलेल्या योगदानाबद्दल उपस्थितांनी त्यांचे कौतुक केले.
कार्यक्रमात विविध क्षेत्रांत कार्यरत असलेल्या माजी विद्यार्थ्यांनी प्राचार्य मोतीभाऊ केंद्रे यांच्या कार्याचा गौरव करताना त्यांच्या शिस्तप्रिय, कर्तव्यनिष्ठ आणि विद्यार्थीहित जपणाऱ्या व्यक्तिमत्त्वाच्या अनेक आठवणींना उजाळा दिला. जिल्हा मुख्याध्यापक संघटनेचे जिल्हाध्यक्ष तसेच नांदेड जिल्हा शिक्षण मंडळाचे उपाध्यक्ष म्हणून त्यांनी केलेल्या उल्लेखनीय कार्याचा विशेष उल्लेख करण्यात आला.
माजी विद्यार्थ्यांनी आपल्या मनोगतात सांगितले की, प्राचार्य केंद्रे यांनी केवळ शैक्षणिक क्षेत्रातच नव्हे तर विद्यार्थ्यांच्या सर्वांगीण विकासासाठी सातत्याने प्रयत्न केले. विद्यार्थ्यांच्या तसेच शिक्षकांच्या विविध प्रशासकीय अडचणी सोडविण्यासाठी त्यांनी नेहमीच पुढाकार घेतला. गरजू व्यक्तींना मदतीचा हात देण्याची त्यांची वृत्ती आजही अनेकांच्या स्मरणात आहे. “आमच्या जीवनाला योग्य दिशा देणारे गुरु म्हणून आम्ही त्यांचे सदैव ऋणी आहोत,” अशा भावना अनेक विद्यार्थ्यांनी व्यक्त केल्या.
यावेळी विद्यार्थ्यांनी प्राचार्य मोतीभाऊ केंद्रे यांच्या पत्नी सौ. सुनिता केंद्रे यांचाही सन्मान करून त्यांच्या सहकार्याबद्दल कृतज्ञता व्यक्त केली. महाराष्ट्राच्या विविध भागांत कार्यरत असलेल्या माजी विद्यार्थ्यांनी या कार्यक्रमासाठी आवर्जून उपस्थित राहत आपल्या गुरूंप्रती असलेला आदर आणि प्रेम व्यक्त केले.
सत्काराला उत्तर देताना प्राचार्य मोतीभाऊ केंद्रे म्हणाले, “माझ्या 33 वर्षांच्या सेवाकाळात हजारो विद्यार्थी घडविण्याचे भाग्य मला लाभले. सेवापूर्तीनंतर विद्यार्थ्यांनी प्रेमाने आयोजित केलेला हा सन्मान सोहळा माझ्यासाठी अत्यंत भावनिक आणि अविस्मरणीय आहे. विद्यार्थ्यांच्या मनात माझ्याविषयी असलेले प्रेम हीच माझ्या आयुष्याची खरी कमाई आहे.”
माजी विद्यार्थ्यांनी सहकुटुंब उपस्थित राहून केलेल्या सन्मानाबद्दल प्राचार्य केंद्रे यांनी सर्वांचे आभार मानले. उपस्थितांनी त्यांच्या पुढील आयुष्यासाठी शुभेच्छा देत गौरव सोहळ्याची सांगता केली.कार्यक्रम यशस्वी करण्यासाठी माजी सैनिक गजानन हेंडगे, भीमराव केंद्रे, माजी सैनिक कैलास मोरे, माजी सैनिक गुणवंत गुट्टे, हाणमंत केंद्रे, अरुण केंद्रे, अॅड. दत्ता निलेवाड, राजीव अंबुलगेकर, कैलास केंद्रे, सौ. अनिता हाणमंत केंद्रे, प्रा. अमित केंद्रे, गोविंद मुंडे, संतोष केंद्रे आदी माजी विद्यार्थ्यांनी व त्यांच्या कुटुंबीयांनी विशेष परिश्रम घेतले.
कार्यक्रमाचे सूत्रसंचालन राजीव अंबुलगेकर यांनी केले, तर आभार प्रदर्शन अॅड. दत्ता निलेवाड यांनी केले.
About the Author
