कंधार: ( विश्वांबर बसवंते )
दिनांक १५ जून २०२६ रोज सोमवारी नूतन शैक्षणिक वर्षास प्रारंभ झाला असून, या शैक्षणिक वर्षाच्या प्रारंभी कंधारचे तहसीलदार रामेश्वर गोरे यांनी तालुक्यातील शेकापूर केंद्रांतर्गत असलेल्या आनंदवाडी येथील जिल्हा परिषद प्राथमिक शाळेस भेट देऊन विद्यार्थ्यांचे पुष्पगुच्छ देऊन स्वागत केले. त्यामुळे विद्यार्थ्यासह पालकांमध्ये आनंदाचे वातावरण पसरल्याचे दिसून आले.
कार्यक्रमाचे प्रारंभी शिक्षणाची आधुनिक देवता सावित्रीबाई फुले यांच्या प्रतिमेचे तहसीलदार रामेश्वर गोरे व उपस्थित मान्यवरांच्या हस्ते पुष्प पूजन करण्यात आले. यावेळी महसूल मंडळ अधिकारी एस. आर.शेख, ग्राम महसूल अधिकारी कस्पटे, ग्रामपंचायत अधिकारी अविनाश दासरवाड, घोडजच्या सरपंच सौ. महानंदा आत्माराम लाडेकर, केंद्रप्रमुख शेख, शालेय व्यवस्थापन समितीचे अध्यक्ष व सन्माननीय सदस्य, शाळेचे मुख्याध्यापक यांची प्रमुख उपस्थिती होती.
शाळेच्या वतीने प्रमुख उपस्थित मान्यवरांचा शाल श्रीफळ व पुष्पगुच्छ देऊन सत्कार करण्यात आला. या सत्काराला उत्तर देताना तहसीलदार गोरे म्हणाले विद्यार्थ्यांनी आई-वडिलांचे संस्कार व शाळेतील शिक्षकांचे संस्कारपर मार्गदर्शन घेऊन, भविष्यात आपण शैक्षणिक क्षेत्रामध्ये स्वतःसह शाळेचे व गावाचे नाव लौकिक करावे, प्राथमिक शिक्षण म्हणजे आपल्या यशाचा मजबूत पाया भक्कम करण्याचे केंद्र होय. त्यासाठी विद्यार्थ्यांनी न चुकता दैनंदिन आपल्या शाळेत उपस्थिती लावून शैक्षणिक व संस्काराचे धडे घेणे आवश्यक असल्याचेही उपस्थित विद्यार्थ्यांना बोलून दाखवले.
त्याचबरोबर प्रत्येक जिल्हा परिषद शाळेमध्ये तज्ञ शिक्षक बांधव असून सुध्दा आपण विनाकारण स्वतःचे वेगळेपण दाखवण्यासाठी शहराच्या ठिकाणी जाऊन इंग्लिश स्कूलमध्ये प्रवेश घेण्यासाठी अनाठही खर्च करता त्यापेक्षा आपली मुले गावातीलच जिल्हा परिषद शाळेत पाठवून पटसंख्या वाढवत वेळोवेळी शाळेत भेटी देऊन आपल्या विद्यार्थ्याच्या प्रगती विषयी चौकशी करणे हे योग्य राहील. विद्यार्थ्यांचा शैक्षणिक दर्जा व शाळेची प्रगती करण्यासाठी आपणच आपल्या शाळेचे संरक्षण करणे काळाची गरज असल्याचेही तहसीलदार गोरे यांनी बोलून दाखवले.
२०२६-२०२७ या नवीन शैक्षणिक वर्षासाठी प्रवेश घेतलेल्या विद्यार्थी व विद्यार्थिनींचे पुष्प व पुष्पहार घालून स्वागत करण्यात आले. यावेळी विद्यार्थी /विद्यार्थिनी पालक व गावातील शिक्षण प्रेमी हे मोठ्या संख्येने उपस्थित होते.
About the Author
