शिक्षिका उषा कागणे व शिक्षक गोपीनाथ गुट्टे यांच्या सेवापूर्ती सोहळ्यात कृतज्ञतेचा भावनिक आविष्कार

Post Views: 16

कंधार | प्रतिनिधी

संत गाडगेबाबा शिक्षण संस्था, कंधार संचलित महात्मा फुले प्राथमिक शाळेच्या शिक्षिका उषा मारोती कागणे आणि महात्मा फुले विद्यालयाचे शिक्षक गोपीनाथ गुट्टे यांच्या सेवानिवृत्तीनिमित्त मंगळवारी (दि. ३० जून) आयोजित करण्यात आलेला सेवापूर्ती सोहळा अत्यंत उत्साहपूर्ण व भावनिक वातावरणात संपन्न झाला.

कार्यक्रमाच्या अध्यक्षस्थानी संस्थेचे संस्थापक अध्यक्ष प्रा. डी. एन. केंद्रे हे होते. प्रमुख पाहुणे म्हणून कंधार पंचायत समितीचे माजी सभापती संभाजीराव पाटील केंद्रे, संस्थेचे सचिव चेतनभाऊ केंद्रे, संचालिका तथा माजी नगराध्यक्षा व विद्यमान नगरसेविका सौ. अनुराधा चेतन केंद्रे, माजी वैद्यकीय अधिकारी डॉ. राजेश गुट्टे, माजी फॉरेस्ट ऑफिसर बालाजी गुट्टे साहेब, महात्मा फुले प्राथमिक शाळेचे मुख्याध्यापक डी. जी. वाघमारे, संत गाडगेबाबा विद्यालय, सोमठाणाचे मुख्याध्यापक धोंडीबा नागरगोजे, माजी मुख्याध्यापक जनार्धन केंद्रे, डॉ. महेश गुट्टे, डॉ. अश्विनी गुट्टे, अधिकारी चेतन गुट्टे,आनंदा आगलावे, राजू केंद्रे, आदीची यावेळी उपस्थिती होती.

संत गाडगेबाबा शिक्षण संस्थाच्या वतीने व मान्यवरांच्या हस्ते सेवानिवृत्त शिक्षकांचा शाल,श्रीफळ,पुष्पहार व आहेर भेटवस्तू देऊन सत्कार करण्यात आला. यावेळी उपस्थितांनी दोन्ही शिक्षकांच्या प्रदीर्घ, प्रामाणिक आणि विद्यार्थीहिताच्या सेवेला उजाळा देत त्यांच्या कार्याचा गौरव केला.

प्रमुख पाहुणे म्हणून कंधार पंचायत समितीचे माजी सभापती संभाजीराव पाटील केंद्रे यांनी दोन्ही शिक्षकांच्या नेमणूक ते सेवानिवृती पर्यतचा प्रवास कथन करत आजच्या शिक्षण पद्धतीवर कडाडून टिका केली. पेपरफुटी हे सरकारचे उपयश असल्याचे त्यांनी यावेळी सांगितले तर
अध्यक्षीय भाषणात प्रा. डी. एन. केंद्रे म्हणाले, “शिक्षक हा समाजाचा खरा राष्ट्रनिर्माता आहे. उषा कागणे आणि गोपीनाथ गुट्टे यांनी आपल्या सेवाकाळात ज्ञानदानाबरोबरच संस्कारांचीही जोपासना केली. त्यांचे योगदान संस्थेसाठी कायम प्रेरणादायी राहील.” स्वतःच्या मुलाबरोबर शाळेतील विद्यार्थांना घडविण्यात ते यशस्वी झाले असे सांगत पुढील कार्याला शुभेच्छा दिल्या.
मुख्याध्यापक डी. जी. वाघमारे म्हणाले, “शाळेच्या प्रगतीमध्ये उषा कागणे मॅडम आणि गोपीनाथ गुट्टे सर यांचे योगदान अत्यंत मोलाचे आहे. त्यांची कार्यनिष्ठा, वेळेचे नियोजन आणि विद्यार्थ्यांप्रती असलेली आत्मीयता आम्हा सर्वांसाठी आदर्श आहे.”
सत्काराला उत्तर देताना उषा कागणे व गोपीनाथ गुट्टे यांनी संस्था, पदाधिकारी, सहकारी शिक्षक, विद्यार्थी आणि पालकांनी दिलेल्या प्रेमाबद्दल कृतज्ञता व्यक्त केली. सेवाकाळातील अनेक आठवणींना उजाळा देताना सभागृहातील वातावरण भावूक झाले.
कार्यक्रमास शिक्षक, शिक्षकेतर कर्मचारी, विद्यार्थी, पालक आणि नागरिक मोठ्या संख्येने उपस्थित होते.