महिलांच्या निरोगी आरोग्य व सक्षमीकरणासाठी योगाचा प्रभावी संदेश
मुखेड: (दादाराव आगलावे)
राष्ट्रीय महिला आयोगाच्या अध्यक्षा विजया रहाटकर यांची नांदेडचे योगरत्नभूषण योगाचार्य सीताराम सोनटक्के गुरुजी यांनी सदिच्छा भेट घेतली. या भेटीत योगाच्या माध्यमातून निरोगी समाज, विशेषतः महिलांचे आरोग्य व सक्षमीकरण या विषयावर सविस्तर चर्चा झाली.
योगाचार्य सीताराम सोनटक्के हे गेल्या अनेक वर्षांपासून निःस्वार्थ भावनेने योगप्रसाराचे कार्य करत आहेत. त्यांनी हजारो नागरिकांना योग, प्राणायाम व ध्यानाचे प्रशिक्षण देत निरोगी जीवनशैलीचा संदेश समाजाच्या प्रत्येक घटकापर्यंत पोहोचविला आहे. विविध शासकीय कार्यालये, शैक्षणिक संस्था, सामाजिक संघटना तसेच सर्वसामान्य नागरिकांसाठी त्यांनी नियमित योगवर्ग, आरोग्य शिबिरे व जनजागृती कार्यक्रम आयोजित करून योग चळवळ अधिक व्यापक केली आहे असे प्रतिपादन
राष्ट्रीय महिला आयोगाच्या अध्यक्षा विजया रहाटकर यांनी केले.त्यापुढे म्हणाल्या की, योगाचार्य सोनटक्के यांनी आजच्या धकाधकीच्या जीवनशैलीत वाढता ताण, मानसिक अस्वस्थता, मधुमेह, उच्च रक्तदाब, लठ्ठपणा यांसारख्या जीवनशैलीजन्य आजारांवर नियमित योग, प्राणायाम आणि ध्यान हा अत्यंत प्रभावी उपाय असल्याचे ती नेहमी सांगत असतात. त्यांचे कार्य मी सोशल मीडियाच्या माध्यमातून पाहिलेले आहे. विशेषतः महिलांनी आपल्या दैनंदिन जीवनात योगाचा समावेश केल्यास त्यांचे शारीरिक, मानसिक आणि भावनिक आरोग्य अधिक सक्षम होऊन आत्मविश्वास वाढण्यास मोठी मदत होते, असे त्यांनी नमूद केले. राष्ट्रीय महिला आयोगाच्या अध्यक्षा विजया रहाटकर यांनी महिलांच्या सर्वांगीण आरोग्य व सक्षमीकरणासाठी योगाचे महत्त्व अधोरेखित करत, योगाच्या माध्यमातून अधिकाधिक महिलांपर्यंत आरोग्याचा संदेश पोहोचविण्यास आपण प्रयत्नशील असल्याचे सांगितले. समाजात सकारात्मक जीवनशैली निर्माण करण्यासाठी योगाचार्य सीताराम सोनटक्के यांचे निःस्वार्थ व सातत्यपूर्ण कार्य प्रेरणादायी असून, त्यांच्या योगसेवेचे त्यांनी विशेष कौतुक केले.
योगाच्या माध्यमातून आरोग्यदायी, व्यसनमुक्त आणि सुदृढ समाज घडविण्याचे ध्येय बाळगून योगाचार्य सीताराम सोनटक्के सातत्याने कार्यरत असून, त्यांच्या मार्गदर्शनाखाली अनेक नागरिकांनी नियमित योगसाधना स्वीकारून निरोगी जीवनाचा मार्ग निवडला आहे. योगाचा प्रसार हा केवळ व्यायामापुरता मर्यादित नसून तो जीवन जगण्याची सकारात्मक पद्धत असल्याचा संदेश ते सातत्याने देत आहेत.
याप्रसंगी नित्य योगसाधक नायब तहसीलदार स्वप्निल दिगलवार, योग सेवा समितीचे कार्यवाहक महेश सोमनवार तसेच नित्य योग सेवा समितीचे पदाधिकारी उपस्थित होते.
About the Author
