प्रतिनिधी : मुखेड
मुखेड शहरातील प्रभाग क्रमांक ३ अंतर्गत अशोकनगर, समतानगर, व्यंकटेश नगर, आंबेडकरनगर, श्रीनगर, शांतीनगर, तसेच पुंडे हॉस्पिटल परिसरात अलीकडे घरफोडीच्या घटनांमध्ये वाढ झाल्याने नागरिकांमध्ये भीतीचे वातावरण निर्माण झाले आहे. या पार्श्वभूमीवर नगर परिषदेचे नगरसेवक हेमंत गंगाधरराव घाटे यांनी शुक्रवारी (२५ जुलै) मुखेड पोलिस ठाण्याचे पोलिस निरीक्षक यांना निवेदन सादर केले.
निवेदनानुसार, २४ जुलै रोजी अशोकनगर येथील श्री भालचंद्र
होसाजी उमाटे यांच्या घरी चोरीची घटना घडली. तसेच परिसरात रात्रीच्या वेळी संशयित चोरट्यांचा वावर असल्याची माहिती नागरिकांकडून मिळत असल्याचे निवेदनात नमूद करण्यात आले आहे. या घटनांमुळे नागरिकांमध्ये असुरक्षिततेची भावना निर्माण झाली असून, रात्रीच्या वेळी नियमित पोलिस गस्त वाढवून चोरट्यांचा बंदोबस्त करावा, तसेच संबंधितांविरुद्ध कठोर कारवाई करून नागरिकांना दिलासा द्यावा, अशी मागणी नगरसेवक हेमंत घाटे यांनी पोलिस प्रशासनाकडे केली आहे. पोलिस प्रशासनाने या निवेदनाची दखल घेऊन आवश्यक ती कारवाई करण्याची अपेक्षा नागरिकांनी व्यक्त केली आहे.
About the Author
